İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 341 Hüküm no: 494 Orijinal metin no: [57a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ayşe Hâtun bt. eş-Şeyh Yakub Efendi’nin mîrâsı Mahmiye-i İstanbul’da Canbâziye mahallesinde vefât eden Ayşe Hâtun bt. eş-Şeyh Yakub Efendi’nin verâseti, li ebeveyn karındaşı oğulları Ahmed Çelebi ve Kadri b. Mehmed’e ve âhar karındaşı oğlu fahrü’l-kuzât Abdülkerim Efendi b. Yusuf’a ve sadriye kızı zahrü’l-muvakkarât Fâtıma Hâtun bt. Fethullah’a munhasıra idiği zâhir ü mütehakkik oldukdan sonra, mezbûr Abdülkerim Efendi tarafından husûs-ı âti’z-zikre vekîl olup, hasm-ı şer‘î-i câhid mahzarında nehc-i şer‘î üzre vekâleti sâbite olan Mustafa b. Turhan meclis-i şer‘de, merkūme Fâtıma Hâtun’un zevci ve vekîli olup bi mâ hüve tarîkü’s-sübût şer‘an vekâleti sâbite olan fahrü’l-ümerâ’i’l-kirâm Hüseyin Bey b. Mehmed müteveffât-ı mezbûrenin cümle muhallefâtını kızı merkūme Fâtıma Hâtun kabz etmeğin müvekkilimin hisse-i şer‘iyyesini da‘vâ ve taleb eylediğimde, vekîl-i mezbûr Hüseyin Bey dahi vekâleti tehârüc-i şer‘î tarîkiyle dokuz bin nakd akçe verip, ben dahi vekâleti hasebiyle meblağ-ı mezbûru vech-i mersûm üzre vekîl-i mezbûr yedinden ahz u kabz [edip ve] müteveffât-ı merkūmenin muhallefâtına müte‘allik âmme-i de‘âvâdan zimmetini ibrâ-i âm ile ibrâ etdim dedikde, mukırr-ı mezbûru ikrâr-ı meşrûhunda mezbûr Hüseyin Bey bi’l-muvâcehe tasdîk edip, mâ hüve’l-vâki‘ gıbbe’t-taleb ketb olundu. Hurrire fi[‘l-yevmi’l]-hâmis min Recebi’l-mürecceb li sene seb‘a ve ışrîn ve elf. Şuhûdü’l-hâl: Ebûbekir Efendi b. Mahmud, Mehmed Çelebi b. Hüseyin, İbrahim b. Yakub, Sefer Çelebi b. Bâli, Hüseyin b. Mustafa ve gayruhüm.