İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 342 Hüküm no: 495 Orijinal metin no: [57a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şemuyel v. Yahuda’nın, Mehmed Paşa Vakfı’na ait işkembeci dükkânı ve oda konusunda Nikola v. Yorgi ile ihtilafının kalmadığı Karaferye cemâ‘atinden Şemuyil v. Yahuda nâm Yahudi meclis-i şer‘de Nikola v. Yorgi nâm zimmî tarafından husûs-ı âti’z-zikre vekîl olup, vekâleti bi mâ hüve nehcü’s-sübût şer‘an sâbite olan Pagona bt. Nikola nâm nasrâniye muvâcehesinde ikrâr ve takrîr-i kelâm edip, merkūm Mehmed Paşa vakfından mahmiye-i İstanbul’da el-Hâc İsa mahallesinde vâki‘, inde’l-ahâlî ve’l-cîrân ma‘lûmü’l-hudûd olup, icâre-i mu‘accele-i ma‘lûme ve ücret-i müeccele-i mu‘ayyene ile müvekkil-i mezbûrun taht-ı tasarrufunda olan bir bâb işkembeci dükkânını ve üstünde bir bâb odayı mezbûr Nikola’dan mukaddem istîcâr etmiş idim deyû târih-i kitâba gelince da‘vâ ve nizâ‘ üzre idim. El-hâletü hâzihî müvekkil-i mezbûr Nikola zimmetini zikr olunan dükkân ve odaya müte‘allik olan âmme-i da‘vâdan ibrâ ve ıskāt eyledim. Ba‘de’l-yevm husûs-ı mezbûra müte‘allik da‘vâ benden veyâhud vekîlimden sudûr ve zuhûr ederse, lede’l-hükkâmi’l-kirâm mesmû‘a ve makbûle olmasın dedikde, gıbbe’t-tasdîk mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ min şehri Recebi’l-mürecceb li sene seb‘a ve ışrîn ve elf. Şuhûdü’l-hâl: El-Hâc Mehmed b. İsmail, Rüstem b. Abdullah, Mehmed b. Süleyman, Ahmed b. Ömer ve gayruhüm.