İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 342 Hüküm no: 496 Orijinal metin no: [57a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb Bey b. Derviş’in İbrahim Beşe b. Bâli’ye borcu olduğu Vilâyet-i Rumeli’nde Niğbolu sancağında Lofça nâm kasaba sâkinlerinden Receb Bey b. Derviş el-cündî meclis-i şer‘de İbrahim Beşe b. Bâli er-râcil mahzarında ikrâr ve i‘tirâf edip, mezbûr İbrahim Beşe’ye deyn-i şer‘îden târih-i kitâbdan üç ay tamamına değin müeccel elli bin akçe deynim olup, mukābelesinde kasaba-i mezbûrede vâki‘ inde’l-ahâlî ve’l-cîrân ma‘lûmü’l-hudûd olan mülk menzilimi ve kasaba-i merkūme tevâbi‘inden Pirsak nâm karyede vâki‘ inde’l-ahâlî ve’l-cîrân ma‘lûmü’l-hudûd olan mülk çiftliğimi, cemî‘-i tevâbi‘ ve levâhık ile mezbûr İbrahim Beşe’ye rehin vaz‘ eyledim idi. El-ân makbûzdur dedikde, mukırr-ı merkūmun vech-i meşrûh üzre cârî olan ikrârın el-mukarru lehü’l-mezbûr bi’l-muvâcehe tasdîk ettikden sonra, mukırr-ı merkūmun karındaşı İbrahim nâm kimesne meclis-i şer‘de takrîr-i kelâm edip, karındaşım mezbûr Receb Bey’in zimmetinde olan elli bin akçeye emr ve kabûlü hâviye kefâlet ile kefîl oldum dedikde, gıbbe’t-tasdîk ketb olundu. Tahrîren fi’l-yevmi’l-hâmis min şehri Recebi’l-mürecceb li sene seb‘a ve ışrîn ve elf. Şuhûdü’l-hâl: Emir Efendi el-hammâmî, Ali Bey sorguccu, Abdurrahman Çelebi b. Ahmed, ve Hasan [b.] Mehmed Çelebi, Mehmed Çelebi [b.] Sefer Bey.