İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 349 Hüküm no: 509 Orijinal metin no: [58b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadı Ahmed Efendi b. İsmail ile Nisâ Hâtun bt. Ali’nin alacak davasında sulh olduğu Vilâyet-i Rumeli’nde bi’l-fi‘il Karinabad kadısı olan kıdvetü’l-kuzât Ahmed Efendi b. İsmail meclis-i şer‘-i şerîfde, kasaba-i Silivri sâkinlerinden olup Vize ve Kırkkilise mukāta‘âtı emîni iken müteveffâ olan Mustafa Çavuş b. Gökmen’in zevc-i metrûkesi olup, menzil-i âti’z-zikre vâzı‘atü’l-yed olan râfi‘atü’l-kitâb Nisâ Hâtun bt. Ali mahzarında ikrâr ve takrîr-i kelâm edip, hâlâ mezbûre Nisâ yed ve tasarrufunda olup, kasaba-i merkūmede Ali Bey mahallesinde vâki‘, tarafeyni Yasin b. Abdullah ve Hasan b. Abdullah mülkleriyle ve tarafeyn-i âhareyni tarîk-i âm ile mahdûd olan menzil, müteveffâ-yı mezkûrûn mülkü olup, hâl-i sıhhatinde karz-ı şer‘îden bana deyni olan elli beş bin akçe ve Handan Bey nâm kimesneye yine karzdan deyni olan kırk bin akçeye emr ve kabûlü hâviye kefâlet ile ben kefîl olmağın, mezbûr Handan Bey’e kefâletim hasebiyle edâ etmeğin, meblağ-ı merkūm kırk bin akçe hakkı, müteveffâ-yı mezbûrun zimmetine lâzım gelen doksan beş bin akçeye menzil-i mezkûru bana bey‘-i bâtla bey‘ edip, semeninden zimmetimde olan doksan beş bin akçeye takas edip, ben dahi vech-i merkūm üzre ibtiyâ‘ ve takas etmiş iken, menzil-i mezkûra mezbûre Nisâ Hâtun bi gayri vech-i şer‘î [ve] vaz‘-ı şer‘î vaz‘-ı yed eder. Yedi kasr ve izâle olunsun deyû mezbûre Nisâ Hâtun’dan taleb ve da‘vâ eylediğimde, mezbûre dahi menzil-i mezkûr benim mülk-i müşterâmdır müteveffâ-yı mezkûrûn alâka ve medhali yokdur deyip, beynimizde münâza‘ât-ı kesîre vukū‘undan sonra beynimizde muslihûn tavassut edip, husûs-ı mezkûru yedi bin akçeye sulh eylediklerinde, ben dahi sulh-ı mezkûru kabûl ve bedel-i sulh olan meblağ-ı merkūm yedi bin akçeyi mezbûre Nisâ Hâtun yedinden alıp kabz edip, husûs-ı mezkûra müte‘allika de‘âvî ve husûmâtdan zimmetini ibrâ-i âm ile ibrâ ve terk-i da‘vâ etdim. Ba‘de’l-yevm bi’z-zât veya bi’l-vâsıta mazmûn-ı kitâba muhâlif da‘vâ sudûr ederse, lede’l-hükkâmi’l-kirâm mesmû‘a olmaya dedikde, mûmâ-ileyh Ahmed Efendi’nin ikrâr-ı meşrûhunda mezbûre Nisâ Hâtun dahi vicâhen tasdîk ve tahkīk etmeğin, mâ vaka‘a bi’t-taleb ketb ü tahrîr ve yed-i tâlibe def‘ olundu. Tahrîren fi’l-yevmi’t-tâsi‘ min Recebi’l-ferd li sene seb‘a ve ışrîn ve elf. Şuhûdü’l-hâl: Ali Ağa b. Şeyh Bâli el-müteferrika, Mehmed Bey b. Hüseyin el-mütevellî, Halil Ağa b. Kemal el-müteferrika, Hasan Bey el-kâtib, Nebi b. Bâli, Mustafa Bey b. Hüseyin, Hâfız Mehmed b. Ahmed el-mütevellî ve gayruhüm mine’l-hâzırîn.