Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 166 Hüküm no: 144 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey’in Katip Murad mahallesindeki menzilini Ahmed Beşe’ye satması Mahmiye-i İstanbul’da Kâtib Murad mahallesi ahâlîsinden fahrü’l-eşbâh Mehmed Bey b. Abdullah meclis-i şer‘-i şerîf-i enverde Ahmed Beşe b. Şa‘bân muvâcehesinde ikrâr ve takrîr-i kelâm edip bey‘-i âtî sudûruna değin silk-i mülkümde münselik olup mahalle-i mezbûrede vâki‘ bir tarafdan Hüseyin Bey mülkü ve bir tarafdan ba‘zan mahalle-i mezbûre müezzinine meşrût vakıf menzil ve ba‘zan Mehmed Çelebi mülkü ve bir tarafdan Berber Yusuf mülkü ve bir tarafdan tarîk-i âm ile mahdûd olup üç beyt-i ulvî ve iki beyt-i süflî ve iki su kuyusu ve cüneyneyi muhtevî menzilimi cümle tevâbi‘ ve levâhıkı ile mezbûr Ahmed Beşe’ye iki yüz elli yedi esedî guruşa tarafeynden îcâb ve kabûlü hâvî bey‘-i bât ile bey‘ ve teslîm, ol dahi iştirâ ve tesellüm ve kabz edip bi-hakkın mezbûr iki yüz elli yedi esedî guruşu mezbûr Ahmed Beşe yedinden ahz u kabz eyledim, ba‘de’l-yevm menzil-i mahdûd-ı mezbûr merkūm Ahmed Beşe’nin mülk-i müşterâsıdır keyfe mâ yeşâ ve yahtâr mutasarrıf olsun dedikde, gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min-Cumâdelâhire li-sene ihdâ ve semânîn ve elf. Şuhûdü’l-hâl: Mehmed Çelebi, Halil, Yusuf Efendi el-imâm, Hasan Efendi el-imâm, Osman Çelebi el-müezzin, Mehmed Çelebi b. Ali, Mehmed b. Yusuf.