İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 357 Hüküm no: 523 Orijinal metin no: [60b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. İsmail’in Partanos v. Yani ve Papa Dimitri’deki alacağının kefîllerinden tahsil edilmesi İşbu râfi‘ü’l-kitâb Mehmed b. Ali nâm râcil meclis-i şer‘-i şerîfde, mahmiye-i İstanbul’da ( ) mahallesi sâkinlerinden Dimo v. Nikola ve İstati v. Yani nâm zimmîler mahzarlarında üzerlerine takrîr-i da‘vâ edip, bundan akdem Barnabos v. Yani ve Papa Dimitri v. Yani nâm zimmîlere ber vech-i iştirâk otuz iki bin akçe karz verip ve bin yirmi altı senesi Rebî‘ilevveli gurresinden sene tamamına müeccel olmak üzre üç bin akçeye dahi çuka bey‘ edip, hâlâ zimmetlerinde otuz beş bin akçesi olup, meblağ-ı merkūmun cümlesine merkūmân Dimo ve İstati emir ve kabûlü hâviye kefâlet ile her biri müstakillen kefîl bi’l-mâl olmakla ve ecel-i mezbûr dahi mürûr etmekle, merkūmân Dimo ve İstati yedlerinde kefâletleri hasebiyle otuz üç bin akçesi olup iki bin akçesi kalmış idi. Bâkī kalan meblağ-ı merkūm iki bin akçeyi dahi taleb ederim dedikde, gıbbe’s-suâl mezbûrân Dimo ve İstati cevâblarında, biz ancak mezbûrân Barnabos ve Papa Dimitri zimmîler yedinde olan yirmi beş bin akçe deynlerine kefîl olmuş idik. Lâkin hîn-i kefâletde otuz beş bin akçe deyû ikrâr ettik, ikrârımızda kâzibleriz dediklerinde müdde‘î-i mezbûr vech-i muharrer üzre merkūmân Dimo ve İstati ikrârlarında kâzib olmadıkları yemîn teklîf olundukda, ol dahi alâ vefki’l-mes’ûle yemîn billâhi te‘âlâ etmeleriyle, bâkī kalan meblağ-ı mezbûr iki bin akçeyi müdde‘î-i mezbûre edâya küfelâ-yı mezbûrân Dimo ve Estati’ye kıbel-i şer‘den tenbîh olunup, mâ vaka‘a bi’t-taleb ketb olundu. Tahrîren fi’l-yevmi’s-sânî min şehri Recebi’l-mürecceb li sene seb‘a ve ışrîn ve elf. Şuhûdü’l-hâl: Mustafa b. Hızır er-râcil, Ahmed b. Şahbaz, Kadri b. Mustafa, Hamza b. Mustafa ve gayruhüm mine’l-hâzırîn.