İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 358 Hüküm no: 524 Orijinal metin no: [60b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Bâli’nin Fâtıma Hâtun bt. Bedreddin’deki alacağını tahsil ettiği Fahrü’l-akrân Mehmed Bey b. Bâli nâm bevvâb-ı sultânî meclis-i şer‘-i şerîfde mahmiye-i İstanbul’da Harâccı Fahreddin mahallesi sâkinlerinden Ramazan b. Hasan ve Fâtıma Hâtun bt. Bedreddin mahzarlarında ikrâr-ı tâm ve ta‘bîr ani’l-merâm edip, bundan akdem mezbûre Fâtıma Hâtun zimmetinde karz-ı şer‘îden ve çuka bahâsından otuz dokuz bin yüz râyic fi’l-vakt akçe hakkım olmağın, mezbûre Fâtıma zimmetinde olan meblağ-ı mezbûr otuz dokuz bin akçeyi bana teslîm etmek için mezbûr Ramazan’ı tevkîl etmiş idim. Hâlâ merkūm Ramazan meblağ-ı mezbûru merkūme Fâtıma yedinden ahz u kabz eyledi ve bana bî-kusûr teslîm etti. Min ba‘d mezbûre Fâtıma zimmetinde bir akçe ve bir habbe hakkım kalmadı dedikde, mukırr-ı mezbûrun ikrâr-ı meşrûhunu mezbûre Fâtıma ve merkūm Ramazan bi’l-muvâcehe tasdîk ve tahkīk etmeğin, mâ vaka‘a bi’t-taleb ketb olundu. Tahrîren fi’l-yevmi’l-hâdî aşer min şehri Receb li sene seb‘a ve ışrîn ve elf. Şuhûdü’l-hâl: Mehmed Çelebi b. Ahmed el-kâtib, Mehmed b. Abdullah, Ali b. Abdullah, Hamza b. Mustafa, Murad b. Mehmed ve gayruhüm.