İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 358 Hüküm no: 525 Orijinal metin no: [61a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ermeni Patriği Avanos v. Murad’ın Millîzade Ali Ağa b. Yusuf’a olan borcunun kalan kısmının tecil edildiği Dârü’s-saltanati’s-seniyye Kostantıniyye el-mahmiyyede Manastır mahallesi sâkinlerinden olup Ermeniler patriği olan Avanos v. Marad meclis-i şer‘-i şerîfde, Dergâh-ı âlî müteferrikalarından râfi‘ü’l-kitâb fahrü’l-emâsil ve’l-emâcid Millîzâde demekle ma‘rûf Ali Ağa b. Yusuf muvâcehesinde bi’t-tav‘i’s-sâ‘ib ikrâr u i‘tirâf edip, her bir zirâ‘ı beş yüz akçeye olmak üzre altmış zirâ‘ altmış çile kırmızı çuka bahâsından otuz beş bin fiddî râyic fi’l-vakt akçe ve deyn-i şer‘îden yetmiş bin mezbûrü’n-na‘t akçe ki, cem‘an zimmetimde mûmâ-ileyh Ali Ağa hazretlerine yüz beş bin akçe olur. Hâlâ beynimizde ilm-i şer‘î ile ma‘lûm fıddî gök yâkûtdan bir altun hâtime beş bin mezbûrü’n-na‘t akçeye müşârun-ileyh Ali Ağa’ya bey‘ ve teslîm edip, ol dahi vech-i muharrer üzre iştirâ ve tesellüm eyledi. Semeni olan meblağ-ı mezbûr beş bin akçemi zimmetimde olan meblağ-ı merkūm yüz beş bin akçeden mezbûr Ali Ağa hazretlerine takas eyledik. Bâkī kalan yüz bin akçe dahi târih-i kitâbdan bir sene tamamına değin müeccel olmak üzre mûmâ-ileyh Ali Ağa hazretlerine zimmetimde lâzımü’l-edâ ve vâcibü’l-kazâ deynimdir dedikde, mukırr-ı mezbûrun vech-i meşrûh üzre el-cârî olan cemî‘ kelimâtını el-mukarru lehü’l-mezbûr Ali Ağa hazretleri bi’l-muvâcehe tasdîk edicek, mâ vaka‘a bi’t-taleb ketb olundu. Tahrîren fi’l-yevmi’l-âşir min şehri Receb li sene tis‘a [seb‘a] ve ışrîn ve elf. Şuhûdü’l-hâl: Mustafa Çavuş b. Hasan Çavuş, Mustafa Ağa b. Abdullah, Mehmed Çavuş b. Mustafa, Hüseyin Beşe b. Abdullah Çukadâr, Süleyman Bey Kethüdâ-yı Ali Paşa, Ali Çavuş b. Bezzâzistân, Yakub Çelebi Bezzâzistân, Ömer Bey b. İbrahim, Hüseyin b. Osman, el-Hâc Musli Bezzâzistân, ve gayruhüm mine’l-hâzırîn.