İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 359 Hüküm no: 526 Orijinal metin no: [61a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ramazan b. İlyas’ın ortaklıktan dolayı Musa b. Abdülkadir ve Hızır b. Hasan’da alacağı olduğu Mahmiye-i İstanbul’da Unkapanı kurbunda sâkin hâmilü’l-kitâb el-Hâc Ramazan b. İlyas mahfil-i kazâda Musa b. Abdülkādir ve Hızır b. Hasan nâm kimesneler mahzarlarında takrîr-i kelâm edip, bundan akdem ben kendi mülküm olan on bir bin akçelik ve merkūm dahi on dokuz bin akçelik ve mersûm Hızır dahi yedi bin akçelik, cem‘an otuz yedi bin akçelik unu bir yere halt edip her birimiz yüz guruşunu? âhara bey‘ etmekle akd-i şirket-i inân tarîkiyle mezbûrlar ile akd-i şirket edip bey‘ ü şirâ etmişler idi. Ba‘dehû muhâsebemiz gördükde re’s-i mâlımdan mezbûr yanında beş bin sekiz yüz seksen akçe kalıp, meblağ-ı merkūm kendülerin makbûzu idüğüne ikrâr dahi etmişler idi. Hâlâ taleb ederim dedikde, gıbbe’s-suâl mezbûrân Hızır ve Musa cevâblarında fi’l-hakīka hâl beynimizde bu minvâl üzre cârî olup muhâsebemiz gördüğümüzde, mezbûr el-Hâc Ramazan’ın re’s-i mâlından ikimizde beş bin sekiz yüz seksen akçesi vardır deyû ikrâr eylediklerinde, merkūmân Musa ve Hızır’ın ikrârı mûcebince meblağ-ı merkūm beş bin sekiz yüz seksen akçenin edâsına tenbîh olunup, mâ hüve’l-vâki‘ gıbbe’t-taleb ketb ü tahrîr ve yed-i tâlibe def‘ olundu. Şuhûdü’l-hâl: Ebûbekir b. Osman, Sinan b. Abdullah, Mustafa b. Hamza, Hüseyin b. Mustafa, Mustafa b. Cafer ve gayruhüm.