Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 167 Hüküm no: 146 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Salih ve eşi Mehmed Beşe’nin menzil ve arsalarını Hatice Hatun’a satmaları Mahmiye-i İstanbul’da Karabaş mahallesinde sâkine Âişe bt. Salih nâm hatun kendi tarafından asâleten ve zevci el-Hâc Mehmed Beşe b. Ömer tarafından husûs-ı âti’l-beyâna vekîl olup vekâleti karındaşları Abdünnebi Odabaşı ve Hasan Beşe b. Ömer nâm kimesneler şehâdetleri ile şer‘an vekâleti sâbite oldukdan sonra vekâleten meclis-i şer‘-i hatîrde işbu bâ‘isetü’l-vesîka Hadîce Hatun bt. Mustafa mahzarında ikrâr ve takrîr-i kelâm edip mahmiye-i mezbûrede eski odalar kurbünde Kızıltaş mahallesinde vâki‘ bir tarafdan Hazînedâr Hasan Bey nâm cündî mülkü ve bir tarafdan Fâtıma Hatun mülkü ve bir tarafdan Kemhacı Mehmed veresesi mülkü ve bir tarafdan tarîk-i hâs ile mahdûd bir bâb fevkānî ve bir bâb tahtânî odaları ve havlu ve kenîfi müştemil mülk menzilimin arsası babamdan müntakil mülk-i mevrûsum ve ebniyesi zevcim mezbûrun mülkü olmağla hâlâ ebniye-i mezbûreyi yirmi bin akçeye ve arsasını dahi on bin akçeye ki cem‘an otuz bin akçeye asâleten ve vekâleten merkūme Hadîce Hatun’a bey‘ ve teslîm, ol dahi vech-i muharrer üzere iştirâ ve kabûl ve tesellüm eyledikden sonra semeni olan meblağ-ı mezbûr otuz bin akçeyi mezbûre Hadîce Hatun yedinden bi’t-tamâm ahz u kabz eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis min-Recebi’l-ferd li-sene ihdâ ve semânîn ve elf. Şuhûdü’l-hâl: Hüseyin Halîfe b. el-Müezzin, Canbaz Mustafa Çelebi b. ( ), Hasan Efendi b. Hüsameddin, el-Hâc Selim b. ( ).