Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 168 Hüküm no: 147 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mekke kadısı iken vefat eden Mehmed Efendi’nin menzilinin satılarak borçlarının ödenmesi Dârü’l-hilâfeti’l-aliyye Kostantıniyyetü’l-mahmiye’de Muhtesib Karagöz mahallesi ahâlîsinden olup bundan akdem Ka‘be-i mükerreme kādısı iken vedâ‘-ı âlem-i fânî eden merhûm Şeyh Mehmed Efendi b. Hüsameddin Efendi’nin verâseti zevce-i metrûkesi umdetü’l-muhadderât Hadîce Hatun ile li-ebeveyn kız karındaşı Ümmühani Hatun’a ve li-ebeveyn ammi oğlu Abdurrahman Efendi b. Veli’ye münhasıra olduğu şer‘an sâbit oldukdan sonra mezbûrân Abdurrahman Efendi ve Ümmühani Hatun taraflarından husûs-ı âti’l-beyâna vekîl olup mezbûr Abdurrahman Efendi tarafından vekâleti hâlâ medîne-i Kastamonu nâibi olan diğer Abdurrahman Efendi b. Abdülfettah b. İlyas kıbelinden vârid olup mazmûnu zeylinde isimleri mastûr olan şuhûd-ı tarîkden Ahmed Efendi b. Osman ve Mahmud Beşe b. Veli nâm kimesneler şehâdetleriyle sâbite olan nakl-i şer‘î ile ve mûmâ-ileyhâ Ümmühani Hatun tarafından vekâleti zâtını ma‘rifet-i şer‘iyye ile ârifân el-Hâc İbrahim Efendi b. Mehmed ve umdetü’l-mehâdîmü’l-kirâm Çivizâde Ataullah Efendi şehâdetleriyle sâbite olup mezbûr diğer Abdurrahman Efendi’nin sulbî oğlu olan Hasan Efendi meclis-i şer‘-i şerîfde müşârün-ileyhâ Hadîce Hatun tarafından husûs-ı âti’l-beyâna vekîl olup Abdullah Efendi b. Abid ve İbrahim Efendi b. ( ) nâm kimesneler şehâdetleriyle şer‘an vekâleti sâbite olan umdetü’l-emâsil ve’l-akrân Hüseyin Çelebi b. Hasan Efendi mahzarında bi’l-vekâle ikrâr-ı tâm ve takrîr-i kelâm edip merhûm-ı merkūmun terekesinden olup mahalle-i mezbûrede vâki‘ tarafeynden tarîk-i âm ve bir tarafdan mûmâ-ileyh Hadîce Hatun mülkü ve bir tarafdan Mehmed Çelebi vakfı olup meşrûtiyet üzere evlâdından Hadîce nâm hatun tasarrufunda olan menzil ile mahdûd tabaka-i ulyâsında altı bâb [31a] oda ve bir orta sofası ve bir tahta-pûş ve bir kilâr ve dehliz ve tabaka-i vüstâsında beş bâb oda ve bir kömürlük ve bir kenîf ve tabaka-i süflâsında bir ahur ve bir su kuyusu ve bir mahzen ve hadîkayı müştemil hâriciye ta‘bîr olunur menzilden dört sehmden müvekkillerimin hisseleri olan üç sehmini vekîl-i mûmâ-ileyh Hüseyin Çelebi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bin dokuz yüz seksen yedi buçuk kıt‘a esedî guruşa bey‘ ve teslîm, mûmâ-ileyh Hüseyin Çelebi dahi müvekkilesi müşârün-ileyhâ Hadîce Hatun için iştirâ ve tesellüm etdiğinden sonra semen-i mezkûr bin dokuz yüz seksen yedi buçuk esedî guruşun iki yüz yirmi beş esedî guruşunu nakid bana teslîm, ben dahi ahz u kabz edip bâkī bin yedi yüz altmış iki buçuk esedî guruşun beş yüz altmış iki buçuk esedî guruşunu müvekkile-i mûmâ-ileyhâ Hadîce Hatun’un merhûm-ı merkūmun zimmetinde olan yedi yüz elli esedî guruş mehir deyninden müvekkillerimin hisselerine isâbet eden beş yüz altmış iki buçuk kıt‘a esedî guruşa takas mûmâ-ileyh Hüseyin Çelebi dahi bi’l-vekâle mukāssa ve kabûl edip bin iki yüz guruşunu merhûm-ı merkūmun mezbûr el-Hâc İbrahim Efendi’ye deyni olan bin beş yüz kıt‘a esedî guruşdan bâkī yedi yüz elli guruşdan ve umdetü’l-mevâli’l-izâm Mehmed Nâyî Efendi’ye deyni olan dört yüz guruş ve Kurd Ali nâm kimesneye deyni olan üç yüz elli guruş ve Ali Efendi’ye deyni olan yüz guruşdan müvekkillerimin hisselerine isâbet eden bin iki yüz guruş için mezbûrûn el-Hâc İbrahim Efendi ve Nâyî Mehmed Efendi ve Kurd Ali ve Ali Efendi’ye verip edâ-i deyn etmekle mûmâ-ileyh Hüseyin Çelebi’yi küllemâ aziltüke fe-ente vekîlî mazmûnu üzere azl ü in‘izâlden masûne vekâlet-i devriye ile vekîl olup ol dahi vekâlet-i mezbûreyi kabûl ve merâsimini edâya ta‘ahhüd eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-Cumâdelâhire li-sene ihdâ ve semânîn ve elf. Şuhûdü’l-hâl: Umdetü’l-mevâli’l-izâm Abdülbaki Efendi, umdetü’l-müderrisîni’l-kirâm Tosyalı Mehmed Efendi, İbrahim b. Sefer, Keresteci Mehmed Çelebi b. Mehmed, Mehmed Çelebi b. Ali.