Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 169 Hüküm no: 148 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacdan gelir iken Mısır’da vefat eden Halil Ağa’nın varislerinin menzil hisselerini Mehmed Efendi’ye satmaları Husûs-ı âti’l-beyânın mahallinde tahrîri iltimâs olunmağın savb-ı şer‘-i mergūbdan Mevlânâ Hasan Efendi irsâl olunup ol dahi mahmiye-i İstanbul’da Tercümân Yunus mahallesi ahâlîsinden olup sâbıkā medîne-i Galata kādısı olan a‘lemü’l-ulemâi’l-izâm efdalü’l-fudalâi’l-fihâm Mehmed Efendi b. el-merhûm Hüseyin Efendi’nin sa‘âdethânelerine varılıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i şerîf olundukda yine mahalle-i mezbûre ahâlîsinden olup bundan akdem hacc-ı şerîfden avdetden Mısr-ı Kāhire’de vefât eden Halil Ağa b. Hüseyin’in verâseti sulbiye kebîre kızı olup vilâyet-i Rumili’nde medîne-i Yenişehir mahallâtından Kazgānîzâde mahallesinde sâkine Hadîce ile li-ebeveyn kız karındaşı Fâtıma’ya münhasıra ve tashîh-i meselesi iki sehmden olup zikr olunan iki sehmin birisi farzen mezbûre Hadîce’ye ve biri usûbeten li’l-ebeveyn kız karındaşı mezbûre Fâtıma’ya isâbet eylediği şer‘an sâbit oldukdan sonra mezbûre Fâtıma Hatun tarafından husûs-ı âti’l-beyâna vekîl olup mezbûreyi ma‘rifet-i şer‘iyye ile ârifân olan Mustafa Beşe b. Musli ve zevci Ahmed Çelebi b. Mehmed şehâdetleri ile vekâleti mahzar-ı hasm-ı münkirde sâbite olan Abdülbaki Çelebi b. Şa‘bân ile mezbûre Hadîce’nin zevci ve mezbûre Hadîce’ye babasından intikāl ve isâbet eden menzil-i âtîden hisse-i şer‘iyyesin bey‘e ve semenini kabz ve kendüye îsâle ve kabz ve îsâl mütevakkıf olduğu umûrun cümlesine vekîl olup mahzar-ı hasm-ı şer‘îde yedinde olan nakl-i şer‘î nâtık olduğu üzere zeyl-i nakilde isimleri muharrer olan şuhûd-ı tarîkden Halil Beşe b. Hasan ve Mehmed b. Abdullah şehâdetleri ile vekâleti sâbite olan zevci diğer Ahmed b. Mahmud nâm kimesneler meclis-i ma‘kūd-ı mezbûrda işbu râfi‘ü’l-kitâbi’l-hâlî ani’l-irtiyâb müşârün-ileyh Mehmed Efendi muvâcehesinde her biri bi’l-vekâle ikrâr ve takrîr-i kelâm edip müvekkiletân-ı mezbûretâna müteveffâ-yı mezbûrdan mevrûs olup zikr olunan Tercümân Yunus mahallesinde vâki‘ bir tarafdan ba‘zan Mu‘allimhâne ve ba‘zan Tercümân Yunus Câmi‘-i şerîf kayyûmuna meşrûta olan vakıf menzil ve bir tarafdan müşârün-ileyh Mehmed Efendi mülkü ve iki tarafdan tarîk-i âm ile mahdûd olup beş bâb fevkānî oda, bir bâb tahtânî oda ve tahtında üç bâb dükkân ve bir su kuyusunu ve kenîfi ve cüneyneyi müştemil mülk menzillerin cümle tevâbi‘ ve levâhıkı ve kâffe-i hukūk ve merâfıkı ile müşârün-ileyh [31b] Mehmed Efendi’ye îcâb ve kabûlü hâvî bey‘-i bâtt ile bin esedî guruşa bey‘ ve teslîm edip mûmâ-ileyh Mehmed Efendi dahi iştirâ ve kabûl ve temellük ve tesellüm eyledikden sonra semen-i mezbûr bin esedî guruşu vekâletimiz hasebiyle yedinden tamâmen ahz u kabz eyledik ba‘de’l-yevm menzil-i mahdûd-ı mezbûr müşârün-ileyh Mehmed Efendi hazretlernin mülk-i müşterâlarıdır, keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Abdi Çelebi ile meclis-i şer‘a gelip alâ-vukū‘ihi inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: Fahrü’l-kuzât Süleyman Efendi b. İbrahim, Fahrü’l-kuzât Mustafa Efendi b. İsmail, Mehmed Efendi b. Ahmed, Sefer Odabaşı, Mehmed Efendi b. Veli.