İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 371 Hüküm no: 549 Orijinal metin no: [63b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Atiye Hâtun bt. Ali’nin varislerinden Zeynep Hâtun bt. Musa’nın, Mehmed Çelebi b. Mustafa ile ev davasında anlaştığı Mahmiye-i İstanbul’da Muhtesib İskender mahallesi sâkinelerinden olup vefât eden Atiye Hâtun bt. Ali’nin kebîr kızı Zeynep Hâtun bt. Musa meclis-i şer‘de müteveffât-ı mezbûrenin kızı olup vefât eden İstemihan Hanım bt. Abdi’nin kebîr oğlu olan râfi‘ü’l-kitâb Mehmed Çelebi b. Mustafa mahzarında ikrâr ve takrîr-i kelâm edip, müteveffât-ı mezbûre Atiye Hâtun hayâtında mahalle-i mezbûrede vâki‘ bir tarafı Emine Hâtun bt. Cafer mülkü ve bir tarafı tarîk-i âm ve iki tarafı Mustafa b. Abdullah mülkü ile mahdûd olan mülk menzilini bi cümleti’t-tevâbi‘ mezbûre İstemihan Hâtun’a yirmi bir bin akçeye bey‘ ve teslîm ve kabz-ı semen murâd edip, lâkin minvâl-i meşrûh üzre menzil-i mezbûrun bey‘inde mezbûr Mehmed Çelebi ile nizâ‘ üzre olup, menzil-i mezbûrda hisse-i şâyi‘amı mezbûr Mehmed Çelebi’den da‘vâ etmiş idim. Hâlâ bey‘-i mezbûru dahi makbûlümdür. Menzil-i mezbûra müte‘allik merkūm Mehmed Çelebi ile da‘vâm yokdur. Ba‘de’l-yevm husûs-ı mezbûra müte‘allik bi’z-zât da‘vâ dahi sudûr ederse, lede’l-hükkâmi’l-kirâm mesmû‘a olmaya dedikde, gıbbe’t-tasdîk kayd şüd. Hurrire fi’t-târihi’l-mezbûr. Şuhûdü’l-hâl: İbrahim Efendi b. Mustafa el-imâm, Mustafa b. Ömer el-müezzin, İbrahim [b.] Bekir el-mütevellî, Hasan Beşe el-habbâz, Mehmed b. Mesih, Mustafa b. Yusuf, Yakub Beşe er-râcil.