İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 372 Hüküm no: 550 Orijinal metin no: [64a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi ile babası Mustafa’nın, Zeynep b. Musa aleyhine olan ev davasından vazgeçtikleri Mahmiye-i İstanbul[‘da] Muhtesib İskender mahallesi sâkinelerinden olup vefât eden İstemihan Hâtun bt. Abdi’nin kebîr oğlu Mehmed Çelebi ve yine müteveffât-ı mezbûrenin zevci Mustafa b. Abdullah meclis-i şer‘de, yine müteveffât-ı mezbûrenin kız karındaşı olan râfi‘atü’l-kitâb Zeynep Hâtun bt. Yunus mahzarında ikrâr ve takrîr-i kelâm edip, bundan akdem müteveffât-ı mezbûre hâl-i hayâtında mahalle-i mezbûrede vâki‘ bir tarafı İbrahim Çelebi b. Mustafa mülkü ve bir tarafı Mustafa’nın şer‘î mülkü ve bir tarafı Mustafa b. Sefer mülkü ve bir tarafı tarîk-i âm ile mahdûd olup, iki bâb beyt-i süflîyi ve bi’r-i mâyı müştemil olan menzilin süknâsı mezbûre Zeynep Hâtun’a vakf ve şart etmiş idi. Hâlâ menzil-i mezbûrun minvâl-i meşrûh üzre vakıf olmağın, mezbûre Zeynep Hâtun ile nizâ‘ üzre idik. El-hâletü hâzihî menzil-i mezkûrûn süknâsı mezbûre İstemihan Hâtun, mezbûre Zeynep Hâtuna vakıf ve şart idüğü bizim dahi ma‘lûmumuz ve makbûlümüzdür. Menzil-i mezbûre müte‘allik ve Zeynep Hâtun ile vechen mine’l-vücûh da‘vâ ve nizâ‘ımız yokdur. Ba‘de’l-yevm husûs-ı mezbûra müte‘allik da‘vâ dahi sudûr eder ise istimâ‘ olunmaya dedikde, gıbbe’t-tasdîk kayd şüd. Hurrire fi’t-târihi’l-mezbûr. Şuhûdü’l-hâl: Es-Sâbikūn.