İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 384 Hüküm no: 571 Orijinal metin no: [66b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bakkal Kosta v. Dimo ile Atanaş v. Yorgi’nin alacak davasında sulh olduğu Mahmiye-i İstanbul’da Zincirlikuyu kurbunda vâki‘ Bakkal tâ’ifesinden Kosta v. Dimo nâm zimmî meclis-i şer‘-i şerîfde, işbu sâhibü’l-kitâb Atanaş v. Yorgi nâm zimmî mahzarında ikrâr ve takrîr-i kelâm edip, bundan akdem mezbûr Atanaş ile şerîk olmak üzre beş bin akçe vermiş idim. Ba‘dehû taleb eylediğimde merkūm Atanaş inkâr etmeğin, beynimizde münâza‘ât-ı kesîre ve muhâsamât-ı şedîde vâkı‘a olmuş idi. El-hâletü hâzihî beynimize muslihûn tavassut edip an inkâr iki bin nakd râyic fi’l-vakt akçeye beni sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr iki bin akçeyi mersûm Atanaş yedinden bi’t-tamâm ahz u kabz edip, zimmetini husûs-ı mezbûra müte‘allik olan cemî‘-i da‘vâdan mersûm Atanaş’ın zimmetini ibrâ-i âm ile ibrâ ve ıskāt-ı hak eyledim. Ba‘de’l-yevm mazmûn-ı kitâba muhâlif benden veya vekîlimden da‘vâ sâdır olursa, lede’l-hükkâmi’l-kirâm istimâ‘ olunmaya dedikde, mukırr-ı mezbûrun vech-i meşrûh üzre ikrârın merkūm Atanaş bi’l-muvâcehe tasdîk edicek, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sânî ve’l-ışrîn min Recebi’l-ferd li sene seb‘a ve ışrîn ve elf. Şuhûdü’l-hâl: Sinan b. Abdullah, Ali b. Abdullah, Hızır b. Abdullah, Eyüb b. Mehmed, Mehmed b. Receb, Bekir b. Osman ve gayruhüm.