İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 384 Hüküm no: 572 Orijinal metin no: [66b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Süleyman b. Derviş’in, Numan b. Veli’deki alacağının ödenmesi Tüccâr tâ’ifesinden el-Hâc Süleyman b. Derviş nâm kimesne mahfil-i kazâya Numan b. Veli nâm kimesneyi ihzâr ve mahzarında üzerine da‘vâ edip, bundan akdem mezbûr Numan zimmetinde attâr eşyâsı bahâsından yedi bin akçe hakkım olup, mukābelesinde beynimizde vasfı ve cinsi ma‘lûm altı bin altı yüz akçe kıymetli Rûsiyyetü’l-asl bir câriye iştirâ ve semenin takas edip, zimmetinde dört yüz akçe hakkım bâkī kalmışdır. Taleb ederim suâl olunsun dedikde, gıbbe’s-suâl mezbûr Numan cevâbında, fi’l-hakīka müdde‘î-i mezbûr el-Hâc Süleyman’a attâr eşyâsı bahâsından yedi bin akçe deynim olup, lâkin merkūm el-Hâc Süleyman câriye-i merkūmeyi yedi bin akçeye bey‘-i bât ile bey‘ edip, zikr olunan yedi bin akçe câriyem semeni deyn-i mezbûrun cümlesine takas edip, zimmetimde bir akçe hakkı kalmamışdır dedikde, gıbbe’l-istintâk mezkûr el-Hâc Süleyman altı bin altı yüz akçeden ziyâdeye iştirâ ve takas ettiğin inkâr edip, merkūm Numan’dan sıdk-ı da‘vâ ve makāline beyyine taleb olundukda, ityân-ı beyyineden izhâr-ı acz edip, mezbûr el-Hâc Süleyman câriye-i mezkûreyi mesfûr Numan’a altı bin altı yüz akçeden ziyâdeye iştirâ etmeyip iddi‘â olunan dört yüzü tafsîl-i sâbık üzre alâ tarîki’t-takas haklaşmaduğuna yemîn teklîf olundukda, mezbûr dahi alâ vefki’l-mes’ûl yemîn billâhi te‘âlâ etmeğin, mersûm el-Hâc Süleyman’a merkūm Numan meblağ-ı mezkûr dört yüz akçenin edâsına tenbîh birle, mâ vaka‘a bi’t-taleb ketb olundu. Hurrire fî evâhiri Recebi’l-ferd sene seb‘a ve ışrîn ve elf. Şuhûdü’l-hâl: El-Hâc Hamis b. İbad, Abdi b. Yahya, el-Hâc Mansur b. Salim, Mustafa b. Gülabi, Sinan b. Abdullah, Ebîbekir b. Osman, Nuh b. Ali ve gayruhüm. El-emru kemâ hurrire fîh Harrerehu’l-fakīri Sübhânehû Ali b. Abdurrauf el-kadri Bursa el-mahrûse. Ufiye anhümâ.