Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 171 Hüküm no: 150 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haraççı Muhyiddin mahallesi avarız vakfı mütevellisi iken vefat eden Ahmed b. İbrahim’de olan vakıf parasının terekesinden tahsil olunması Mahmiye-i İstanbul’da Haraçcı Muhyiddin mahallesinin avârızına merhûme Hadîce Hatun vakfeylediği nukūdun savb-ı şer‘îden mansûb mütevellîsi olan işbu bâ‘isü’l-kitâb Halil Çelebi b. Osman meclis-i şer‘-i hatîrde kendiden mukaddem vakf-ı mezbûra mütevellî olup bundan akdem vefât eden müezzin el-Hâc Ahmed b. İbrahim’in verâseti zevce-i metrûkesi Belkıs bt. Abdullah’a ve sulbiye kebîre kızı Hadîce’ye ve li-ebeveyn karındaşı oğlu el-Hâc Abdülbaki b. Şa‘bân ile âhar li-ebeveyn karındaşı oğulları İbrahim ve Osman ve Ahmed Efendi’ye münhasıra olduğu şer‘an mütehakkık oldukdan sonra verese-i müteveffâ-yı mezbûrdan mezbûr el-Hâc Abdülbaki mahzarında bi’t-tevliyet üzerine da‘vâ ve takrîr-i kelâm edip müteveffâ-yı mezbûr el-Hâc Ahmed târîh-i kitâbdan on dört sene mukaddem nukūd-ı mevkūfe-i mezbûreye mütevellî olmağla asl-ı mâl-ı vakf-ı mezbûrdan Yusuf Çelebi nâm kimesne zimmetinde mütekarrir olan otuz yedi buçuk esedî guruş ve Mahmud Çelebi nâm kimesne zimmetinde mütekarrir olan elli esedî guruşu huzûr-ı cemâ‘at-i Müslimînde bi’t-tevliye ahz u kabz edip mücehhelen fevt olmağla min-haysü’l-mecmû‘ makbûzu olan seksen yedi buçuk esedî guruşun tereke-i müteveffâ-yı mezbûrdan tazmîn olunmasın taleb ederim, suâl olunsun dedikde gıbbe’s-suâl ve akībe’l-inkâr mütevellî-i mezbûrdan müdde‘âsını mübeyyine beyyine taleb olundukda udûl-ı Müslimînden olup mahalle-i mezbûre sükkânından İbrahim Beşe b. Mehmed ve el-Hâc Ahmed Beşe b. Hasan nâm kimesne li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr el-Hâc Ahmed târîh-i kitâbdan on dört sene mukaddem mâl-ı vakf-ı mezbûrdan merkūm Yusuf Çelebi zimmetinde mütekarrir olan otuz yedi buçuk esedî guruşu ve mezbûr Mahmud Çelebi zimmetinde mütekarrir olan elli esedî guruşu bizim huzûrumuzda merkūmân Yusuf Çelebi ve Mahmud Çelebi’den ahz u kabz edip mücehhelen fevt olmağla min-haysü’l-mecmû‘ makbûzu olan seksen yedi buçuk esedî guruşun tereke-i müteveffâ-yı mezbûrdan vakf-ı mezbûr için tazmîn olunması lâzımdır, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-Cumâdelâhire li-sene ihdâ ve semânîn ve elf. Şuhûdü’l-hâl: Mefharü’l-müderrisîni’l-kirâm Ahmed Efendi b. Hüseyin, Hasan Efendi b. Nasuh, Ahmed Ağa b. Mehmed el-Hammamî, İbrahim Efendi b. Yusuf, Salih Çelebi b. İsmail.