Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 172 Hüküm no: 151 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapiste bulunan İstemad’ın iflasına karar verilerek serbest bırakılması Medîne-i Hazret-i Ebâ-Eyyûb Ensârî -radiye anhu Rabbühü’l-bârî- mahallâtından Zeyneb Hatun mahallesi ahâlîsinden gāib ani’l-meclis Halil Çelebi b. el-Hâc Mehmed nâm kimesne berât bahâsından deyn olan on iki bin yedi yüz akçe için dört aydan beri sicn-i sultânîde mahbûs olan İstemad v. Yorgi nâm zimmîden vech-i âtî üzere istişhâd-ı şer‘î sudûrundan sonra udûl-ı ricâlden olup mahmiye-i İstanbul’da Hadîce Sultan mahallesi ahâlîsinden Mustafa b. Bali ve yine mahalle-i mezbûre ahâlîsinden Mehmed b. Abdullah ve Hasan b. Abdullah nâm kimesneler li-ecli’l-şehâde meclis-i şer‘a hâzırûn olup istişhâd olunduklarında fi’l-hakīka mezbûr İstemad’ın kirâren ve mirâren hâlini istifsâr edip müflis ve ma‘dûm olup lâbis olduğu libâsından mâ‘adâ ismi mâl ıtlâk olunur nesnesi olmamağla müşhid-i mezbûrun kudret-i mâl [ve] vüs‘at-i hâle vusûlüne değin hapisden ıtlâk olunup imhâl ve sebîli tahliye olunması lâzım olduğuna biz şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde yesârına şâhid olmamakla hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri gıbbe ri‘âyeti şerâiti’l-kabûl şehâdetleri makbûle ve mûcebince müsteşhid-i mezbûrun iflâsına hüküm ve kazâ edip müsteşhid-i mezbûrun zevcesi Linsaba bt. Yorgi ve Âişe Hatun bt. Abdullah ve kaynanası Gül Kadın müsteşhid-i mezbûrun nefsine ve hîn-i mütâlebede meclis-i şer‘a ihzârına [kefîl] olduklarından sonra mezbûrânın nefislerine dahi işbu hâzır bi’l-meclis Kosta nâm zimmî kefîl olmağın müsteşhid-i mezbûr hapisden ıtlâk edip yesârı sübûtuna dek sebîlini tahliye etmeğin mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-Recebi’l-ferd li-sene ihdâ ve semânîn ve elf. Şuhûdü’l-hâl: Mehmed ağa kethüdâ-yı muhzırân, Şükrullah Bey b. Mustafa, Abdi Çelebi b. İsa, Mehmed b. Abdullah.