İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 391 Hüküm no: 583 Orijinal metin no: [68a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. Mehmed’in, boşandığı eşi Gülbeşe bt. Abdullah’a müdahaleden men edildiği Mahmiye-i İstanbul mahallâtından Tahtaminâre mahallesi sâkinelerinden Gülbeşe bt. Abdullah nâm hâtun meclis-i şer‘-i şerîfde Ramazan b. Mehmed mahzarında takrîr-i kelâm ve ta‘bîr ani’l-merâm edip, merkūm Ramazan mukaddemâ zevcim olup, târih-i kitâbdan üç sene mukaddem zimmetinde olan üç bin akçe mehr-i müeccelimden ve nafaka-i iddetimden ferâğ üzre mezbûr ile muhâla‘a-i sahîha-i şer‘iyye ile muhâla‘a edip, hukūk-ı zevciyyete müte‘allik da‘vâdan biri birimizin zimmetin bi’l-külliye ibrâ edip, mezbûrun talâk-ı bâyin ile mutallakası iken, hâlâ inkâr edip benimle zevciyyet üzre mu‘âşeret etmek ister. Suâl olunup ihkāk-ı hak olunmak taleb ederim dedikde, gıbbe’s-suâl mezbûr Ramazan cevâbında, fi’l-hakīka mezbûre Gülbeşe mukaddemâ zevcem olup, târih-i kitâbdan üç sene mukaddem vech-i merkūm üzre üç bin akçe mehr-i müeccelinden ve nafaka-i iddetinden ferâğ üzre mezbûre ile muhâla‘a ve zevciyyete müte‘allik da‘vâdan biri birimizin zimmetin ibrâ etmekle, tafsîl-i sâbık üzre muhâla‘a olup beynimizde beynûnet vâkı‘a olmuşdur deyû tâyi‘an ikrâr etdikde, mezbûr Ramazan bî-vech-i şer‘î ta‘arruzdan men olunup, vâki‘ hâl mezbûre Gülbeşe talebiyle ketb ve terkīm olunup, yed-i tâlibe def‘ olundu. Tahrîren fi’l-yevmi’s-sâdis ve’l-ışrîn min Recebi’l-mürecceb li sene seb‘a ve ışrîn ve elf. Şuhûdü’l-hâl: Kulu b. Ahmed, Hüseyin Bey, Süleyman b. Abdullah, Baba Nasûh b. Yusuf, el-Hâc Ali b. Abdullah ve gayruhüm.