Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 172 Hüküm no: 152 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Musa Beşe’nin varislerinin Musli Beşe aleyhindeki alacak davasında anlaşma sağlanması Vilâyet-i Anadolu’da Yoros kazâsına tâbi‘ kasaba-i Beykoz ahâlîsinden olup bundan akdem Havâss-ı refî‘a kazâsı muzâfâtından kasaba-i Terkos kurbünde Malatra nâm mevzi‘de garîkan vefât eden Musa Beşe b. Abdullah’ın verâseti zevce-i metrûkesi Âişe bt. Şa‘bân ve sulbî sagīr oğulları Halil ve İbrahim ve Mustafa ve sulbiye sagīre kızı Fâtıma’ya münhasıra olduğu şer‘an sâbit oldukdan sonra mezbûre Âişe kendi tarafından asâleten ve sıgār-ı mezbûrûnun vâlideleri ve kıbel-i şer‘den mansûb vasîleri olmağla vesâyeten meclis-i şer‘-i şerîfde dergâh-ı âlî yeniçerilerinden dördüncü cemâ‘ate mahsûs odada sâbıkā odabaşı olan işbu râfi‘ü’l-kitâb Musli Beşe b. Mehmed nâm kimesne mahzarında ikrâr ve takrîr-i kelâm edip müteveffâ-yı mezbûr hayâtında kendüye bir yeniçeri esâmesi alıverilmek için doksan guruşunu bi-tarîkı’r-rüşve mezbûr Musli Beşe yedine def‘ ü teslîm, mezbûr Musli Beşe dahi vech-i muharrer üzere ahz u kabz etmekle meblağ-ı mezbûru mezbûr Musli Beşe’den mukaddemâ da‘vâ etdiğimde mezbûr Musli Beşe dahi müteveffâ-yı mezbûr meblağ-ı mezbûru vech-i muharrer üzere esâme alıvermek için sâlifü’z-zikr odada çorbacı olan Mustafa Ağa’ya ver deyü verip ben dahi alıp mezbûr Mustafa Ağa’ya vermiş idim deyü da‘vâ-yı def‘ edip ben dahi inkâr etdiğimde mezbûr Musli Beşe’nin def‘-i mezbûruna şâhidleri olup isbât etmesi emr-i mukarrer olup sulh sıgār-ı mezbûrûn hakkında nâfi‘ olmağla muslihûn tavassut edip mezbûr Musli Beşe ile beynimizde elli beş esedî guruş üzerine inşâ-i akd-i sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûr elli beş esedî guruşu mezbûr Musli Beşe yedinden tamâmen ahz u kabz edip husûs-ı mezbûra müte‘allıka âmme-i da‘vâdan bi’l-asâle mezbûr Musli Beşe’nin zimmetini ibrâ ve iskāt eyledim dedikde, gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Recebi’l-mürecceb li-sene ihdâ ve semânîn ve elf. Şuhûdü’l-hâl: Mehmed Beşe b. Veli, Sadık Bey b. Abdülbaki, Abdulkadir Beşe b. Ebubekir, Mehmed Çelebi b. Abdi, Abdünnebi Beşe b. Mehmed, Mehmed Beşe b. Mehmed.