.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 84
Hüküm no: 64
Orijinal metin no: [10a-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Yorgi v. Manol’un şayka diye bilinen geminin dörtte bir hissesini el-Hâc Abdurrahman’a sattığı

Sefîne reislerinden Yorgi v. Manol nâm zimmî mahfil-i şer‘-i şerîfde işbu sâhibü’l-kitâb el-Hâc Abdurrahman b. Ali nâm kimesne muvâcehesinden ikrâr-ı tâm ve takrîr-i kelâm edip mezbûr el-Hâc Abdurrahman’a şayka tâ‘bir olunur yirmi beş zirâ‘ sefînenin rub‘unu otuz beş bin akçeye bey‘ ve teslîm ol dahi iştirâ ve tesellüm ve kabûl eyleyip semen-i mersûm otuz beş bin akçeyi yedinden tamamen ahz u kabz eyledim ba‘de’l-yevm zikri sebk eden şaykanın ve dâhilinde olan beş gemi demiri ve altı komine ve isparçine ve mayistra ve sâir âlât-ı lâzımesinin reis-i mezbûr Abdurrahman’ın mülk-i müşterâsıdır, keyfe mâ yeşâ’ ve yehtâr mutasarrıf olsun dedikde mukırr-ı mezbûrun vech-i muharrer üzere cârî olan ikrârını el-mukarru lehü’l-merkūm el-Hâc Abdurrahman vicâhen ve şifâhen tasdîk ve tahkīk etmeğin mâ-vaka‘a kayd şüd,

Fî-15 Şa‘bân sene 1063.

Şuhûdü’l-hâl: Seyyid Muhtar Efendi b. Ömer, el-Hâc Mehmed Celal, el-Hâc Mehmed b. Yusuf, Ahmed b. Ali, Kadri? Efendi.