.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 85
Hüküm no: 65
Orijinal metin no: [10a-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Vefât eden Eğerci Hızır’ın terekesinin hanımına kaldığı

Mahmiye-i İstanbul’da Elvanzâde Mahallesi’nde sâkin iken bundan akdem vefât eden Eğerci Hızır b. Said’in verâseti zevce-i metrûkesi Fâtıma bt. Mesud ve sulbî oğlu Mehmed nâm sagīre münhasıra olduğu şer‘an sâbit oldukdan sonra mezbûr Mehmed dahi vefât edip hâlâ verâseti farzan ve redden vâlidesi Fâtıma’ya münhasıra olmağla mezbûrenin tarafından meblağ-ı âti’l-beyânı ahz u kabz ve kendüye asâleten vekîl olup zâtı ma‘rifet-i şer‘iyye ile ârifân olan el-Hâc Salim b. Mehmed ve el-Hâc Ebûbekir b. Ebîzeyd şehâdetleri ile vekâleti sâbite olan zevci el-Hâc Ramazan b. Mehmed mahfil-i kazâda fahrü’l-müderrisîn Mustafa Efendi taraflarından tasdîka vekîl olan İbrahim Çelebi b. Mehmed mahzarında ikrâr edip müteveffâ-i mezbûr Hızır’ın müvekkil-i mezbûr yedinde eğer bahâsından bin dokuz yüz akçe hakkı bâkī kalmağın kable’l-istîfâ vefât etmekle meblağ-ı mezbûru müvekkilem mezbûre için ahz u kabz edip zimmetinde bir akçe ve bir habbe hakkı kalmadı dedikde mâ-vaka‘a bi’t-taleb ketb olundu.

Tahrîren fi’l-yevmi’s-sânî ve’l-ışrîn min-Şa‘bâni’l-mu‘azzam li-sene selâse ve sittin ve elf.

Şuhûdü’l-hâl: el-Hâc Ali Efendi b. Salih, es-Seyyid Ali Çelebi b. Kasım, el-Hâc Salim [b.] Ahmed, el-Hâc Ali b. Süleyman, el-Hâc Bayezid, el-Hâc Ahmed Efendi b. Seydî, el-Hâc Ali b. ( ), el-Hâc Ali b. Ebîbekir ve gayruhum.