İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 400 Hüküm no: 601 Orijinal metin no: [70b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merzifon sâkinlerinden Cafer b. Abdullah’ın arsasını Hacı Hüseyin b. Abdullah’a sattığı Vilâyet-i Anadolu’da Merzifon sâkinlerinden Cafer b. Abdullah nâm kimesne meclis-i şer‘-i şerîfde, hâfız-ı hâze’l-kitâb el-Hâc Hüseyin b. Abdullah nâm râcil mahzarında ikrâr edip, kasaba-i mezbûrede Sofracıoğlu mahallesinde vâki‘, bir tarafdan Serkiz nâm zimmî tarlası ve bir tarafdan Gore nâm zimmî mülkü ve bir tarafdan Tavas nâm zimmî mülkü ile ve bir tarafdan tarîk-i âm ile mahdûd mülk harâbe menzil yerini, mezbûra yüz elli akçeye bey‘-i bât ile bey‘ etdim, ol dahi iştirâ ve kabûl ve kabûl etdikden sonra semeni olan meblağ-ı mezbûru merkūmun yedinden ahz u [kabz] edip, mebî‘-i merkūmu mahallinde kabza müşterî-i merkūmu taslît etdim dedikde, mukırr-ı mezbûru ikrâr-ı meşrûhunda el-mukarru lehü’l-mezbûr bi’l-muvâcehe tasdîk edip, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâdis min Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Maden b. Mehmed, Osman b. Himmet, Mehmed b. Abdullah er-râcil, Hamza b. İbrahim.