İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 401 Hüküm no: 602 Orijinal metin no: [70b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Yani’nin, koyun bedelinden Mehmed b. Abdullah’taki alacağının kefîlinden tahsil edilmesi Celeb tâ’ifesinden sâhibü’l-kitâb Dimo v. Yani nâm zimmî meclis-i şer‘-i şerîfde, mahmiye-i Kostantıniyye’de Çakır Ağa mahallesi sâkinelerinden Ayşe bt. Yusuf nâm hâtun mahzarında takrîr-i kelâm edip, kasab tâ’ifesinden olup mezbûre Ayşe’nin zevci olan Mehmed b. <> Abdullah zimmetinde, re’si beynimizde ilm-i şer‘î ile ma‘lûm koyun bahâsından on sekiz bin beş yüz akçe hakkım olup, meblağ-ı merkūmdan yedi bin akçesin mezbûr Mehmed yedinden alup kabz edip, bin beş yüz akçesini dahi Mehmed Çavuş b. İsmail nâm kimesneye havâle-i şer‘iyye ile havâle edip, bin yedi yüz akçesin dahi mezbûr Mehmed Çavuş’dan alup kabz edip, dokuz bin sekiz yüz akçe hakkım zimmetinde kalıp, meblağ-ı merkūm dokuz bin sekiz yüz akçeyi târih-i kitâb senesi Rebî‘ilâhiri’nin sekizinci gününden doksan gün tamamına değin te’cîl eylediğimde, zevcesi mezbûre Ayşe meblağ-ı merkūma emr [ve] kabûlü hâviye kefâlet ile kefîl olmuşidi. El-hâletü hâzihî ecel-i mezbûr mürûr etmeğin, meblağ-ı merkūm dokuz bin sekiz yüz akçeyi kefâlet cihetiyle mezbûre Ayşe’den taleb ederim dedikde, gıbbe’s-suâl mezbûre Ayşe cevâbında, ecel-i mezbûr mürûr edip ve meblağ-ı merkūma vech-i muharrer üzre kefîl olduğuna bi tav‘ihâ mu‘terife olmağın, mezbûrenin i‘tirâfı mûcebince meblağ-ı merkūme dokuz bin sekiz yüz akçenin edâsıyla ilzâm olunup, mâ vaka‘a gıbbe’t-taleb ketb ü tahrîr olundu. Tahrîren fi’l-yevmi’s-sâdis min Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Eyüb b. Mehmed, Mustafa b. Hamza, Himmet b. Mustafa.