İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 401 Hüküm no: 603 Orijinal metin no: [70b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Safiye Hâtun bt. Yahya’nın bakkal dükkânını Andon v. Dimitri’ye kiralaması Mahmiye-i Kostantıniyye mahallâtından Eski İmâret mahallesi sâkinelerinden Safiye Hâtun bt. Yahya tarafından husûs-ı âti’z-zikre vekîl olup, Mehmed b. Musa ve Mehmed b. Mustafa şehâdetleriyle vekâleti sâbite olan Mehmed Çavuş b. Mustafa meclis-i şer‘de, işbu sâhibü’l-kitâb Andoni v. Dimitri nâm zimmî muvâcehesinde bi’l-vekâle takrîr-i kelâm edip, müvekkilem mezbûre Safiye Hâtun’un mahalle-i mezkûrede vâki‘ inde’l-ahâlî ve’l-cîrân ma‘lûmü’l-hudûd olan bir bâb bakkal dükkânı târih-i kitâbdan bir sene tamamına değin merkūm Andoni’ye yedi bin akçeye ve her mutasarrıf olduğu sene için yedişer bin mezbûr altun akçe vermek üzre îcâr edip, ol dahi vech-i meşrûh üzre istîcâr ve kabûl eyledikden sonra, müvekkile-i merkūm Safiye Hâtun mezbûr Andon’a dükkân-ı merkūmdan sermâye edinmek için yirmi bin fıddî râyic fi’l-vakt akçe ikrâz ve teslîm etti deyû ikrâr edip, el-mukarru lehü’l-merkūm mukırr-ı mezbûru ikrâr-ı meşrûhunda tasdîk ettikden sonra, dükkân-ı merkūmun ücretine ve meblağ-ı mezkûre Apostol v. Dimitri ve Kosta v. Astamo nâm zimmîler emr ve kabûlü hâviye kefâlet ile her biri alâ haddihî kefîl olduklarında, mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî min Şa‘bâni’l-mu‘azzam li sene seb‘a ve ışrîn ve elf. Şuhûdü’l-hâl: Hasan b. Mustafa, Sinan b. Abdullah, Bekir b. Osman, Mehmed Çavuş b. Ferruh, Mustafa b. Mehmed.