İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 410 Hüküm no: 619 Orijinal metin no: [72b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni ve annesi Emine’nin kahveci Ali’ye hizmet karşılığı borçlarının ödendiği Mahmiye-i İstanbul sâkinlerinden Ali b. Abdullah nâm kahveci mahfil-i kazâda, bundan akdem fevt olan Minval b. Abdullah nâm kahvecinin sulbiye sagīre kızı Ümmühâni’nin vâlidesi olup, kıbel-i şer‘den mansûbe vasîsi olan Emine bt. Abdullah nâm hâtun tarafından tasdîk-i âtîye vekîl olup, hasm-ı şer‘î-i câhid mahzarında ikrâr ve takrîr-i kelâm edip, müteveffâ-yı mezbûrun zimmetinde iki kıt‘a kaliçe bahâsından bin beş yüz akçe hakkım olup, vefât ettikde müteveffâ-yı merkūmun muhallefâtından vasiyy-i mezbûrun makbûzundan taleb edip, ikāmet-i beyyine-i âdile ile isbât edip hükm sadedinde iken sagīre-i mezbûreye nef‘an muslihîn tavassut ettikde, husûs-ı mezbûru beş yüz akçeye inşâ’-i sulh ettiklerinde, ben dahi sulh-ı mezbûru kabûl ve bedel-i sulh olan meblağ-ı merkūmu müvekkile-i mezbûre yedinden alıp kabz edip, mâ‘adâsından merkūmetân Ümmühâni ve Emine’nin zimmetini ibrâ-i âm ile ibrâ ve ıskāt eyledim. Ba‘de’l-yevm meblağ-ı merkūme bi’z-zât ve bi’l-vâsıta benden da‘vâ sudûr ederse inde’l-hükkâm mesmû‘a olmaya dedikde, gıbbe’t-tasdîki’ş-şer‘î kayd olundu. Hurrire fî evâili Şa‘bâni’l-mu‘azzam sene 1027. Şuhûdü’l-hâl: Es-Sâbikūn.