İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 431 Hüküm no: 658 Orijinal metin no: [78a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey’in kaybolan atının ortaya çıktığı Vilâyet-i Rumeli’nde Bosna sancağı sâkinlerinden fahrü’l-akrân Ahmed Bey b. Mustafa tarafından da‘vâ-yı âti’l-beyâna Hasan b. İbrahim ve Yusuf b. Beşir şehâdetleriyle vekâleti sâbite olan, işbu râfi‘ü’l-kitâb Hüseyin Bey b. Lütfullah meclis-i şer‘de, Mustafa b. Ahmed mahzarında üzerine bi’l-vekâle takrîr-i da‘vâ edip, bundan müvekkil-i mezbûr Ahmed Bey’in hâzır bi’l-meclis olan kır iğdiş burnu ve kulakları üzerinde damgaları olan beygir suvarında? mülkünden zâyi‘ olmuş idi. Hâlâ zikr olunan beygiri mezbûr Mustafa yedinde olan vekâletim hasebi ile taleb ederim dedikde, gıbbe’s-suâl mezbûr Mustafa Beşe cevâbında, sâbikü’z-zikr beygiri Rodoscuk’da İlyas nâm kimesneden dört bin beş yüz akçeye iştirâ etdim, mezbûrun mülkü olup minvâl-i meşrûh üzre mülkünden zâyi‘ olduğu ma‘lûmum değildir dedikde, vekîl-i mezbûrdan takrîrine muvâfık beyyine taleb olundukda, udûl-i Müslimînden yine livâ-i mezbûrdan Hüseyin Bey b. İskender ve Hasan Bey b. Yusuf nâm kimesne li ecli’ş-şehâde meclis-i şer‘a hâzırân olup, istişhâd olunduklarında, fi’l-vâki‘ sâbiku’z-zikr beygir müvekkil-i mezbûr Ahmed Bey’in mülküdür suvarında? gezerken mülkünden zâyi‘ etmişdir. Bu husûsa şâhidleriz şehâdet dahi ederiz deyû edâ-i şehâdet-i şer‘iyye ettiklerinde, şehâdetleri hayyiz-i kabûlde vâkı‘a olmağın, müvekkil-i mezbûre rast gelip murâd ederse yemîn vermek üzre mûcebiyle hükm olundu. Hurrire fî evâili Ramazan sene [10] 27. Şuhûdü’l-hâl: Hamza b. Mustafa, Ahmed b. Hüseyin, el-Hâc Osman b. ( ), Hasan b. Nasûh, Bekir b. Osman.