İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 441 Hüküm no: 676 Orijinal metin no: [80a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Derviş Ağa b. İshak’ın mîrâs bıraktığı evin bazı hisselerinin Mustafa Bey’e satıldığı Mahmiye-i Kostantıniyye mahallâtından Mimar Ayas mahallesi sâkinlerinden iken bundan akdem vefât eden Derviş Ağa b. İshak’ın verâseti, sulbî kebîr oğulları Hasan Çelebi’ye ve Osman Çelebi’ye ve sulbiye kebîre kızları Hatice ve İhsan ve Sitti nâm hâtunlara münhasıra olup, mesfûr Hasan Çelebi meclis-i şer‘-i şerîfde, işbu sâhib-i kitâb-ı sıhhat-intisâb fahrü’l-akrân Mustafa Bey b. Mehmed mahzarında ikrâr ve i‘tirâf edip, mahalle-i merkūmede vâki‘ bir tarafı Musa Bey mülkü ile ve bir tarafı Balcı Solakbaşı kızı Sâime nâm hâtun mülkü ile ve bir tarafı merhûme Sinan Paşa ve Yusuf Paşa odaları ile ve bir tarafı tarîk-i hâs ile mahdûd olup, muhavvata-i dâhiliyesi bir tahtânî ve bir fevkānî beyti ve iki dehlizi ve iki kenîfi ve bi’r-i mâ’ı ve muhavvata-i hâriciyesi dört aded nâ-tamâm büyûtu ve nısf-ı âharı müştemil olan menzil müteveffâ-yı mezbûrun mülkü olup, fevt oldukda irs-i şer‘le bana ve verese-i mezbûresine intikāl edip, beynimizde menzil-i mezbûr alâ mâ farazallâhi te‘âlâ taksîm olunmadın merkūme Sitti Hâtun dahi vefât edip, verâseti li eb kız karındaşı Hatice’ye ve li ebeveyn kız karındaşı merkūme İhsan’a ve li eb er karındaşı olduğum sebebden bana ve li eb karındaşı Osman Çelebi’ye münhasıra olmakla, menzil-i merkūm yetmiş sehim olup zikr olunan yetmiş sehmin yirmi sehmi babam müteveffâ-yı mezbûrdan bana ve yirmi sehmi mezbûr Osman Çelebi’ye ve otuz sehmi dahi mezbûre Sitti ve İhsan ve Hatice’ye isâbet edip, ba‘dehû mezbûre Sitti hâtun dahi fevt oldukda, menzil-i mezbûre şâyi‘ olan on sehmin beş sehmi li ebeveyn kız karındaşı mezbûre İhsan’a ve iki sehmi bana ve iki sehmi Osman Çelebi’ye ve bir sehmi mesfûre Hatice’ye isâbet etmiş idi. Hâlâ babam müteveffâ-yı mezbûrda irs-i şer‘î ile bana intikāl eden yirmi sehmi ve kız karındaşımdan intikāl eden iki sehmi mûmâ-ileyh Mustafa Bey’e otuz bin nakd râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen etdim. Ba‘de’l-yevm sihâm-ı mezbûre merkūm Mustafa Bey’in mülk-i müşterâsıdır dedikde, mukırr-ı merkūmun ikrâr-ı meşrûhunu müşterî-i mezkûr dahi bi’l-muvâcehe tasdîk edicek, mâ vaka‘a ketb olundu. Hurrire fi’l-yevmi’r-râbi‘ min şehri Ramazâni’l-mübârek li sene seb‘a ve ışrîn ve elf. Şuhûdü’l-hâl: Mustafa Çelebi b. Mustafa el-imâm, Osman Efendi b. Mehmed el-imâm, Mustafa Efendi b. Hamza el-imâm, Abdülkādir Çelebi b. Ali el-imâm, Mehmed Beşe b. Ahmed er-râcil, Ömer Beşe b. Ahmed er-râcil, Ahmed Beşe b. Hasan, Mehmed Bey b. Hüseyin, Musa b. Abdullah, Fahrü’l-kuzât Hasan Efendi b. Abdünnebî, Kâtibü’l-hurûf Süleyman Çelebi.