İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 457 Hüküm no: 705 Orijinal metin no: [83b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiyye bt. Abdullah ile Ebrir v. Dimitri’nin kasap aletleri ile davasının anlaşmayla sonuçlandığı Mahmiye-i Kostantıniyye mahallâtından ( ) mahalleden Rukiyye bt. Abdullah mahfil-i kazâda Ebrir v. Dimitri mahzarında takrîr-i kelâm edip, mezbûr Ebrir zimmetinde bundan akdem zevcim olan Süleyman b. Abdullah’dan kalma bir kasab terâzisi ve okka ve balta ve sâir kasab âlâtı olup, da‘vâ ve taleb eylediğimde, zimmî-i mezbûr dahi benden bin beş yüz akçe taleb edip, mâbeynimizde münâza‘ât-ı kesîre vâkı‘a olmuş idi. El-hâletü hâzihî beynimizde muslihûn tavassut edip, zimmî-i mezbûrdan zikr olunan terâzi ve okka ve balta ve sa’ir mukābelesinde yüz yirmi fiddî râyic fi’l-vakt akçe alıp, bâkīsinden ferâğ etdim, ol dahi zikr olunan bin beş yüz akçeden ferâğ edip, birbirimizin zimmetini ibrâ eyledik. Ba‘de’l-yevm mezbûr zimmî ile husûs-ı mezbûre müte‘allik da‘vâ ve nizâ‘ım yokdur. Eğer da‘vâ edersem inde’l-hükkâm mesmû‘a olmasın dedikde, gıbbe’t-tasdîk, mâ vaka‘a bi’t-taleb ketb olundu. Hurrire fî evâsıtı Şevvâli’l-mükerrem li sene seb‘a ve ışrîn ve elf. Şuhûdü’l-hâl: Hamza b. Mustafa, Sinan b. Abdullah, Ali b. Abdi, Hüseyin b. Mustafa