İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 465 Hüküm no: 716 Orijinal metin no: [86b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kuşadası, Akçaşehir ve diğer yerlerden gelen susamın saf ve halis olmasına dikkat edilmesi Mefâhirü’l-kuzât ve’l-hükkâm me‘âdinü’l-fezâ’il ve’l-kelâm Kuşadası ve Akçaşehir ve Balat ve Mandece ve Eyne ve Sobıça kadıları -zîde fazluhüm- ve südde-i sa‘âdetimde kāimmakām olan düstûr-ı mükerrem-i mu‘azzam müşîr-i müfahham nizâmü’l-âlem Vezir Mehmed Paşa -edâmallahu te‘âlâ iclâlehû- nun Kuşadası’nda binâ eylediği hanın üzerine emîn olan Şaban tevkī‘-i refî‘-i hümâyûn vâsıl olıcak ma‘lûm ola ki, hâlâ İstanbul kadısı olan akzâ kuzâti’l-Müslimîn evlâ vülâti’l-muvahhidîn Mevlânâ Seyyid Mehmed -zîdet fezâ’iluhu- südde-i sa‘âdetime mektûb gönderip, mâ tekaddemden ol câniblerden gelen simsim sâfî ve hâlis gelir iken suhûletle işlenip pâk ve tâhir yağı hâsıl olup, Müslümanlar alıp isti‘mâl ederler iken hâlâ tîn ü turâbla âlûde ve mahlût gelmekle yağ işleyenler toz ve toprakdan tefrîk ve tathîrde hayli usret çekip ve hâsıl olan yağ bey‘ ü şirâya ve narha küllî ihtilâl verip, bulanık olduğu İstanbul’da olan şîrugancı tâ’ifesine i‘lâm edip, arz eyle deyû ilhâh ve ibrâm eyledikleri i‘lâm etmeğin, olageldiği üzre hâlis gönderilmek emrim olmuşdur. Buyurdum ki ( ) vusûl buldukda, vârid olan emr-i şerîfim muktezâsınca İstanbul’a gelen simsim kadîmden olunageldiği üzre hâlis ve sâfî gönderip mahlût ve âlûde gönderenleri men‘ u def‘ eyleyesiz, memnû‘ olmayıp muhâlefet edenleri ve muhtâc-ı arz olanları ism ü resmleri ile vukū‘u üzre yazıp arz eyleyesin, min ba‘d hilâf-ı şer‘-i şerîf ve mugāyir-i emr-i hümâyûn kimesneye iş etdirmeyesiz, şöyle bilesiz alâmet-i şerîfe i‘timâd kılasız. Tahrîren fî evâsıtı şehri Recebi’l-mürecceb sene seb‘a ve ışrîn ve elf. Be makām-ı Kostantıniyye el-mahrûse.