İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 469 Hüküm no: 722 Orijinal metin no: [88a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Sultan Vakfı’na ait Badracık Kazası’ndan çalışmak için İstanbul’a gelen reayanın yasal olmayan vergi talebiyle rencide olunmaması Ayşe Sultan re‘âyâsının emr-i şerîfidir. Efâzıl-ı kuzâti’l-müslimîn evlâ vülâti’l-muvahhidîn me‘âdinü’l-fezâ’il ve’l-yakīn vâris-i [ulûmi’l]-enbiyâ ve’l-mürselîn hücecü’l-hakkı ale’l-halkı ecma‘în el-muhtâssûn bi mezîdi inâyeti’l-meliki’l-mu‘în mevlânâ İstanbul ve Galata ve Üsküdar ve Hâslar kadıları -zîdet fezâ’iluhüm- tevkī‘-i refî‘-i hümâyûn vâsıl olıcak ma‘lûm ola ki, iftihârü’l-havâss ve’l-mukarrebîn mu‘temedü’l-mülûk ve’s-selâtîn el-muhtas bi mezîdi inâyeti’l-meliki’l-mennân Dârü’s-sa‘âdetim ağası el-Hâc Mustafa -dâme ulüvvuhû- hâlâ Dersa‘âdet’ime arz gönderip, taht-ı nezâretinde olan evkāf re‘âyâsından merhûme Ayşe Sultan -tâbet serâhâ-nın defter-i cedîd-i hâkānîde mukayyed evkāfı re‘âyâsı min külli’l-vücûh serbest olup ve isimleri defter-i cedîd-i hâkānîde mukayyed olan re‘âyâsı vakf-ı şerîfe ettikleri hizmet mukābelesinde resm-i mâhîden ve masdariyye ve kantâriyye ve kul ve câriye ve kazma ve kürek ve ordu akçesinden ve acemioğlanı teklîfinden ve nüzül ve kürekçi ve tulum ve gerdek ve odun ve saman ve çayır hizmeti teklîfinden ve sâir teklîf-i örfiyyeden mu‘âf ve müsellem olup, cebren ümenâ ve ummâl ve nuzzâr ve yasakçılar ve kapıcılar re‘âyâsının beytü’l-mâline ve yavacılar ve balık emînleri ve istihdâm kulları dahl u rencîde eylemez iken, müşârun-ileyhânın evkāfından Badracık Kazâsına tâbi‘ Mekşe nâm karye keferesinden ba‘zıları zikr olunan kadılıklara kâr u kisb için gelip sâkin olmakla, hilâf-ı defter-i cedîd-i hakānî ve emr-i şerîf teklîf-i mezbûr ile rencîde vü remîde eylediklerin bildirmeğin, min ba‘d bu bâbda mukaddemâ verilen emr-i şerîf ve defter-i cedîd-i hâkānîye muhâlif isimleri defter-i cedîd-i hâkānîde mukayyed re‘âyâ-yı vakfı cebren teklîfât-ı mezbûre ile kimesne rencîde vü remîde eylememek bâbında emr-i şerîfim verilmek ricâ eylemeğin, ellerinde emirleri var ise, hilâf-ı emr ve defter rencîde ettirilmeye deyû emr edip buyurdum ki, hükm-i şerîfim vardıkda, bu bâbda sâdır olan fermân-ı celîlü’l-kadrim mûcebince amel eyleyip, dahi husûs-ı mezbûra mukayyed olup göresin. Fi’l-hakīka evkāf-ı mezbûre re‘âyâsı min külli’l-vücûh serbest olup, cânib-i vakfa olan hizmetleri mukābelesinde bâlâda mezkûr olan tekâlîfden mu‘âf ve müsellemler olup, cebren ümenâ ve ummâl ve iş erleri ve sâir teklîf ve sâir tekâlîf-i mîrî cem‘ine me’mûr olanlar dahl eylemez iken, hâlâ hilâf-ı defter-i cedîd-i hâkānî ve emr-i şerîf karye-i mezbûre keferesinden olup taht-ı kazânıza kâr ü kisb için sâkin olan re‘âyâ-yı vakfı olagelmişe muhâlif bî-vech ve bilâ-sebeb rencîde vü remîde eylemek isterler ise men‘ u def‘ edip, min ba‘d evkāf-ı mezbûre re‘âyâsından olup isimleri defter-i cedîd-i hakānîde mukayyed olan re‘âyâsını mukaddemâ ellerine verilen mu‘âfnâmelerine ve deftere muhâlif teklîf-i merkūm ile kat‘â kimesneye rencîde vü remîde ettirilmeyip, husûs-ı mezbûr için tekrâr emr-i şerîfim taleb olunmalı eylemeyesin, şöyle bilesin ve ba‘de’n-nazar bu hükm-i hümâyûnumu bunların ellerinde ibkā edip, alâmet-i şerîfe i‘timâd kılasın. Tahrîren fi’l-yevmi’t-tâsi‘ aşer şehri Ramazâni’l-mübârek li sene seb‘a ve ışrîn ve elf. Be makām-ı Kostantıniyye.