İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 470 Hüküm no: 723 Orijinal metin no: [88b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arapgir, Evin ve diğer yerlerden İstanbul’a yerleşen Ermeni ve Rumların cizyelerinin tahsil edilmesi Seyyid Sadi Bey’in perâkende cizyesi emridir. Akzâ kuzâti’l-müslimîn efâhim-i vülâti’l-muvahhidîn ma‘denü’l-fazl ve’l-yakīn vâris-i ulûmi’l-enbiyâ’ ve’l-mürselîn, muhâlasan ale’l-hakkı ecma‘în, el-muhtas bi mezîdi inâyeti’l-meliki’l-mu‘în İstanbul ve Galata ve Hâslar ve Üsküdar kadıları -dâmet me‘âliyehum- ve mefâhirü’l-kuzât ve’l-hükkâm ma‘denü’l-fazl ve’l-kelâm İznik ve Yoros ve Aydıncık kadıları zîde fazluhüm tevkī‘-i refî‘-i hümâyûn vâsıl olıcak ma‘lûm ola ki, taht-ı kazânızda vilâyet-i Anadolu’da ve Arabgir ve Eğin ve gayriden gelip tavattun eden, perâkende Ermeni ve Rûmiyân ve Trabzon keferesinin bin yirmi sekiz târihinde üzerlerine edâsı lâzım gelen cizyelerinin cem‘ine me’mûr olan Seyyid Sa‘di elinde olan berâtı mûcebince tahsîl eylemek bâbında emr-i şerîfim recâ eylemeğin, zamânı hulûl eyledikde, vech-i meşrûh üzre cem‘ ve tahsîl etdirmek emr edip buyurdum ki, hükm-i şerîfim ile mezbûr vardıkda, bu bâbda sâdır olan fermân-ı sa‘âdetim üzre amel edip, dahi zikr olunan vilâyetde perâkende olan taht-ı kazânızda tavattun eden Ermeni ve Rûmiyân ve Trabzon keferesinin târih-i mezkûre mahsûb olmak üzre üzerlerine vâcib olan perâkende cizyelerin zamânı hulûl eylediğin mûmâ-ileyh Seyyid Sa‘di’nin eline verilen berât-ı cedîd ve işbu emr-i şerîfim mûcebince olageldiği üzre cem‘ u tahsîl etdirip, malımın cem‘ ve tahsîlinde gereği gibi takayyüd olup, bu bâbda bir ferd inâd [ve] muhâlefet ettirmeyesiz. El-hâsıl tâ’ife-i mezbûrenin zimmetlerini târih-i merkūmun cizye malında bir akçe ve bir habbe bâkī kodurmayasız. Ammâ husûs-ı mezbûrda ziyâde dikkat ve ihtimâm eyleyip, hilâf-ı emr-i şerîf re‘âyâya te‘addî vü tecâvüz ettirmeyip, ber vech-i sadâkat ve istikāmetde edâ-yı hizmet etdiresiz. Şöyle bilesiz alâmet-i şerîfe i‘timâd kılasız. Tahrîren fi’l-yevmi’l-hâmis min şehri Ramazan sene seb‘a ve ışrîn ve elf. Be makām-ı Kostantıniyye el-mahrûse.