İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 476 Hüküm no: 729 Orijinal metin no: [90b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer Ağa câmiinin tamir edilmesi Mâ fîhi mine’l-ahbâr vaka‘a indî harrere’l-fakīr İbrahim b. Süleyman el-muvellâ hilâfeten bi Kostantıniyye el-mahmiyye -ufiye anhümâ- Mahmiye-i İstanbul’da vâki‘ merhûm Cafer Ağa Evkāfı’na bi’l-fi‘il mütevellî olan bâ‘isü’l-kitâb Süleyman Bey b. Abdullah meclis-i şer‘-i şerîfde takrîr-i kelâm edip, merhûm-ı mezbûrun mahmiye-i mezkûrede vâki‘ mescid-i şerîfin ba‘zı mevâzi‘inde kıbel-i şer‘den me’zûn olmağla ta‘mîr etmişidi. Kıbel-i şer‘den ehl-i hibre ile üzerine varılıp, ta‘mîr olunan mevâzi‘inin mertebe-i tahammülü tahmîn olunup ketb ve tahrîr olunmağın taleb ederin dedikde, savb-ı şer‘den Mevlânâ İsmail Efendi b. Ömer ve Hâssa mi‘mârlarından Üstâd Fazlı Bey b. Hüsameddin irsâl olunup, zeyl-i kitâbda mastûrü’l-esâmi olan ahâlî ile mahall-i mezbûre varıp ve keşf eylediklerinde fi’l-hakīka mescid-i şerîfin cidârân-ı erba‘ası ber vech-i meremmet ta‘mîr olunmuş bulunup, mesâha olundukda bi hesâb-ı şatrancî seksen beş zirâ‘ olup, her zirâ‘ına ellişer akçeden dört bin üç yüz otuz akçe ve müceddeden binâ olunan taş havlu cidârın bi hesâb-ı mezbûr üç yüz doksan bir zirâ‘ olup, beher zirâ‘ına ellişer akçeden on yedi bin yedi yüz elli beş akçe ve üç yüz kırk bir zirâ‘ sakafının zirâ‘ına yirmi beşer akçeden yedi bin sekiz yüz yirmi akçe ve mescid-i şerîfin sedd-i haremine ve zikr olunan duvarların derzine ve tavanı ve pencerelerine ve camlarına ve harc-ı nakkâşına ve minâre ve meremmetine ve kayyım odasına ve sâir cemî‘ harcı lâzımesine dokuz bin sekiz yüz elli akçe olup, zikr olunan mescid-i şerîfin ta‘mîr-i mevâzi‘inin sekiz yüz akçe noksanı ihrâc olundukdan sonra, cem‘an otuz dokuz bin altı yüz yirmi akçe ta‘mîr ve tahammülü olduğun mi‘mâr-ı mezbûr ve sâir ahâlî-i vakf ile ihbâr eylediklerin mevlânâ-yı merkūm mahallinde tahrîr ve mahfil-i kazâda inhâ ve takrîr etmeğin, mâ hüve’l-vâki‘ bi’t-taleb ketb olundu. Tahrîren fî evâili Cemâziyelâhir li sene seb‘a ve ışrîn ve elf. Şuhûdü’l-hâl: Fahrü’l-kuzât Mustafa Efendi b. Abdüllatîf, Fahrü’l-akrân Mehmed Ağa ez-zevvâk, Fahrü’l-a‘yân Ahmed Ağa el-müteferrika, Ahmed Bey b. Aydın en-nüvvâb, Mustafa Bey b. Ömer el-cündî, Tacir Ali Çelebi bezzâzistânî, Hacı Hüseyin b. Abdullah er-râcil, Mahmud Çelebi b. Musa, el-Hâc İbrahim Mustafa el-müezzin, Yusuf Çelebi [b.] Behrâm el-imâm, Ali Efendi el-imâm ve gayruhüm.