İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 482 Hüküm no: 737 Orijinal metin no: [92b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan Ahmed câmii evkâfından olan câmi etrafındaki boş dükkânlara çizmeci esnâfının yerleştirilmesi Akzâ kuzâti’l-Müslimîn evlâ vülâti’l-muvahhidîn ma‘denül-fazl ve’l-yakīn hüccetü’l-hakkı ale’l-halkı ecma‘în, vâris-i ulûmü’l-enbiyâ’ ve’l-mürselîn, el-muhtas bi mezîdi inâyeti’l-meliki’l-mu‘în, mevlânâ İstanbul kadısı -dâme fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki, merhûm ve mağfûrun leh babam Sultan Ahmed -aleyhi’r-rahmeti ve’l-gufrân- câmi‘-i şerîfinin evkāfı mütevellîsi tarafından südde-i sa‘âdetime arzuhâl sunulup, zikr olunan câmi‘-i şerîfin etrâfında olan kârgir dükkânlarda saray mesti ve papucu füruht edenler iskân edeler deyû emr-i şerîf verilip, haffâflardan her birinden beş nefer kimesne zikr olunan dükkânlara ta‘yîn olundukda, cümle çarşu ma‘mûr olmayıp, nice dükkân hâlî kalmağın, ehl-i vukūf ile müşâvere olundukda, hâssa çizmecibaşı cemî‘-i hırfeti ile dükkânlara geldiği takdîrce ma‘mûr ve âbâdân olur deyû haber vermekle, çizmecibaşı cümle tevâbi‘i ile gelip, lâkin zikr olunan dükkânlardan gayrı yerde İstanbul içinde yedi yaşından kırk yaşına varınca dikilen saray mesti ve papuçu satılmayıp, eğer satılır ise cerîmelerle alınıp ve bu husûsa İstanbul Muhtesib Ağası olanlar mübâşir olmak üzre emr-i şerîf verilmesin recâ etmeğin, vech-i meşrûh üzre amel olunmak fermânım olmuşdur. Buyurdum ki ( ) vusûl buldukda bu husûsa mukayyed olup, dahi vech-i meşrûh üzre amel eyleyip. zikr olunan dükkânlardan gayrı yerde İstanbul içinde Saray mesti ve papuçu sattırmayıp, muhkem tenbîh-i ekîd eyleyesiz ve bu bâbda İstanbul’da Muhtesib Ağası olanlar mübâşir olup, ba‘de’t-tenbîh, eslemeyip inâd ve muhâlefet edenlerin cerîmeleri alınıp, emr-i şerîfimin icrâsında sa‘y u ihtimâm eyleyesiz. Zikr olunan dükkânların ma‘mûr ve âbâdân olması mühimmâtdandır. Ona göre mukayyed olup, sa‘y-i cemîl oluna. Şöyle bilesin alâmet-i şerîfe i‘timâd kılasın. Tahrîren fî evâsıtı Cumâdelûlâ sene seb‘a ve ışrîn ve elf. Be makām-ı Kostantıniyye. Vasale 19 Cumâdelûlâ sene 1027.