İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 485 Hüküm no: 740 Orijinal metin no: [93b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şehzâde Sultan Mehmed Vakfı’na ait Zeyrek köyünün saray mutfağına odun mükellefiyeti dışında herhangi bir vergi yükümlülüğünün olmadığı Akzâ kuzâti’l-Müslimîn evlâ vülâti’l-muvahhidîn madenü’l-fazl ve’l-yakīn vâris-i ulûmü’l-enbiyâ ve’l-mürselîn hüccetü’l-hakkı ale’l-halkı ecma‘în el-muhtas bi mezîdi inâyeti’l-[meliki’l]-mu‘în mevlânâ el-hâkimü’l-adl bi kazâ-i İstanbul -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki, iftihârü’l-havâss ve’l-mukarrebîn mu‘temedü’l-mülûk ve’s-selâtîn Dârü’s-sa‘âdetim ağası Mustafa Ağa -dâme ulüvvuhû- hâlâ Dersa‘âdet’ime arz gönderip, mahrûse-i İstanbul’da vâki‘ merhûm ve mağfûrun-leh Şehzâde Sultan Mehmed Hân -tâbe serâhu- Evkāfı’ndan Galata Kazâsına tâbi‘ Vâdi-i Zeyrek nâm karye re‘âyâsından ba‘zıları İstanbul’da sâkin olup, sâir evkāf re‘âyâsı mu‘âfiyetleri mukābelesinde her sâl matbah-ı âmire’ye veregeldikleri kırk iki bin çeki odunu bunlar dahi ma‘an edâ edip, hizmetlerinde kusûrları yoğiken, hâlâ bu makūle evkāf re[‘âyâ]sına olagelmişe muhâlif anbara otluk hizmeti teklîf olunup, rencîde vü remîde olunmakdan hâlî değillerdir. Min ba‘d otluk hizmeti ve tekâlîf-i sâir teklîf olmayıp, üslûb-ı sâbık üzre mu‘âf ve müsellem olmaları bâbında emr-i şerîfim recâsına i‘lâm eylemeğin, vech-i meşrûh üzre amel olmak emr edip, dahi husûs-ı mezbûra mukayyed olup göresin. Ol makūleleri evkāf-ı mezbûre re‘âyâsından olup, İstanbul’da sâkin olanlar kadîmü’l-eyyâmdan hizmet-i mezbûre mukābelesinde cümle tekâlîfden mu‘âflar iken hâlâ anbara otluk hizmeti ve sâir tekâlîf-i örfiyye ve şâkka taleb ve teklîf edip rencîde vü remîde edenleri vâki‘ ise men‘ u def‘ edip, min ba‘d evkāf-ı mezbûre re‘âyâsı otluk hizmeti ve tekâlîf ile kimesneye rencîde vü remîde ettirmeyip, husûs-ı mezbûr için tekrâr emr-i şerîfim taleb olunmalı eylemeyesiz, şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâlis ve’l-ışrîn min [şehri] Cemâziyelâhir li sene seb‘a ve ışrîn ve elf. Be makām-ı Kostantıniyye el-mahrûse.