İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 486 Hüküm no: 741 Orijinal metin no: [94a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul Ermeni Patriği’nin ve ehl-i örfün kanunsuz fazla vergi taleplerinin önlenmesi Keşişlere müte‘allikdir. Akzâ kuzâti’l-Müslimîn evlâ vülâti’l-muvahhidîn madenü’l-fazl ve’l-yakīn hüccetü’l-hakk ale’l-halk ecma‘în vâris-i ulûmi’l-enbiyâ ve’l-mürselîn el-muhtas bi mezîdi inâyeti’l-meliki’l-mu‘în Mevlânâ İstanbul kadısı -dâmet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki, kazâ-i mezbûr sâkinlerinden Abraham ve Haçador ve Tomar ve Bedros ve Gazar ve Andriyas ve diğer Haçador nâm papazlar Dersa‘âdet’ime arzuhâl sunup, bizler ra‘iyyet keşişlerinden olup kâr ü kisbde olmayıp, fukarâdan olup hâlâ patriğimiz olan ve sâir ehl-i örf tâ’ifesin hilâf-ı kānûn ve mugāyir-i berât-ı hümâyûn hamursuz nâmına ve çarhî nice bid‘at peydâ edip, küllî akçemiz alıp zulm ü te‘addîden hâlî değildir, hayfdır, men‘ olunup hilâf-ı kānûn ziyâde bir akçe alınmamak bâbında emr-i şerîf recâ ederiz deyû bildirmeğin, kānûn üzre olagelenden ziyâde alınmaya deyû emr edip buyurdum ki, hükm-i şerîfim vardıkda husûs-ı mezbûra mukayyed olup göresin. Fi’l-vâki‘ mezbûrûn papazlar lâzım gelen rüsûmların kānûn üzre ve fermân-ı âlîşânım muktezâsınca edâ eylemeğe râzılar iken me’mûr olanlar kanâ‘at eylemeyip, hilâf-ı kānûn ve mugāyir-i berât-ı hümâyûn ziyâde akçelerin alıp zulm ü te‘addî eyledikleri vâki‘ ise men‘ u def‘ edip, mezbûrları hilâf-ı kānûn ve olagelmişe mugāyir kimesneye fukarâyı rencîde vü remîde ettirmeyesin, husûs-ı mezbûr için tekrâr şikâyete gelmeli eylemeyesiz, şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâdis aşer min şehri Rebî‘ilâhir li sene seb‘a ve ışrîn ve elf. Be makām-ı Kostantıniyye el-mahrûse.