İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 486 Hüküm no: 743 Orijinal metin no: [94b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Trabzon’dan çalışmak için Trabzon gelen Yani v. Lefter ve Parişkere v. Dori’den İstanbul’da tekrar vergi alınmaması Akzâ kuzâti’l-Müslimîn evlâ vülâti’l-muvahhidîn madenü’l-fazl ve’l-yakīn vâris-i ulûmü’l-enbiyâ ve’l-mürselîn hüccetü’l-hakkı ale’l-halkı ecma‘în el-muhtas bi mezîdi inâyeti’l-meliki’l-mu‘în mevlânâ el-hâkimü’l-adl bi kazâ-i İstanbul -dâmet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki, Yani v. Lefter ve Pereşkere v. Dori nâm zimmîler Dersa‘âdet’ime arzuhâl sunup, biz Trabzon kazâsı sâkinlerinden olmağla, her sene vâcib olan cizyemizi vilâyetimize emr-i şerîf ile cem‘a me’mûr olanlara edâ eyleyip, elimize mühürlü ma‘mûlün-bih temessük alıp kusûrumuz yoğiken, İstanbul’a rençberlik etmeğe geldiğimizde, kānûn üzre altı ay sâkin oldukdan sonra bu harâcda me’mûr olanlara verilirken, hâlâ tekrâr bizden ikişer yüz akçe perâkende harâcı taleb edip, rencîde ederler, hayfdır, men‘ olunmak bâbında emr-i şerîf recâ ederiz deyû bildirmeğin, hilâf-ı şer‘ ve kānûn rencîde olunmayalar deyû emr edip, husûs-ı mezbûra mukayyed olup göresin. Fi’l-vâki‘ mezbûrlar her sâl vâcib olan harâcların vilâyetlerinde ber-mûceb-i emr ve defter me’mûr olanlara edâ edip, ellerine ma‘mûlün-bih temessük alıp ve İstanbul’da rençberlik ederler iken yava cizyelerin dahi kānûn üzre verip kusûrları yoğiken, hâlâ mezkûrândan perâkende harâcı nâmına ikişer yüz akçe taleb edip rencîde eyledikleri vâki‘ ise men‘ u def‘ edip, mademki asl-ı harâcların cem‘ine me’mûr olanlara edâ eylediklerine ma‘mûlün-bih temessükleri ola, min ba‘d mezkûrları hilâf-ı şer‘ ve kānûn ve mugāyir-i emr-i hümâyûn rencîde vü remîde etdirmeyesiz deyicek, izin târihi ile müverrah emr-i şerîf gelmişken cülûs-ı hümâyûn-ı sa‘âdet-makrûnum vâki‘ olmağla, ol emr-i şerîfi getirip tecdîd recâ eylemeğin buyurdum ki, emr-i şerîfim vardıkda bu bâbda mukaddemâ mazmûn-ı mesfûr üzre verilen emr-i şerîfinden sonra hilâfına emr-i âhar vârid olmuş değil ise mûcebince amel edip, min ba‘d hilâfına rızâ vü cevâz göstermeyesiz, şöyle bilesiz alâmet-i şerîfe i‘timâd kılasız. Tahrîren fi’l-yevmi’t-tâsi‘ aşer min [şehri] Saferi’l-hayr li sene seb‘a ve ışrîn ve elf. Be makām-ı Kostantıniyye.