Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 181 Hüküm no: 167 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Macar asıllı cariye Şahbaz’ın vefat eden sahibi Kara Mehmed Beşe tarafından vasiyetle azat edilmiş olduğunu ispat etmesi İşbu açık kaşlı sarı elâ gözlü Macariyyetü’l-asl tahmînen sinni on seneye bâliğa olup nefsinden ta‘bîre kādire olan sâhibetü hâze’l-kitâb Şahbaz bt. Abdullah meclis-i şer‘-i hatîr-ı lâzımü’t-tevkīrde bundan akdem mahmiye-i İstanbul’da Mustafa Bey Mahallesi sükkânından olup Girid Cezîresi’nde vefât eden Kara Mehmed Beşe’nin zevce-i metrûkesi ve vârisesi olup merkūme Şahbaz’a müteveffâ-yı mezbûrun câriye-i memlûkesi olmak üzere vâzı‘atü’l-yed olan Saliha bt. Abdullah nâm hatunun hâlâ zevci ve zikri âtî husûsda murâfa‘a-i şer‘a ve redd-i cevâba vekîli olduğu yine mahalle-i mezbûre sükkânından Beşir Beşe b. Abdullah ve Mustafa Halîfe b. Mehmed şehâdetleri ile sâbit olan İmâm Mehmed Efendi b. Hasan mahzarında üzerine da‘vâ ve takrîr-i kelâm [edip] ben müteveffâ-yı mersûm Kara Mehmed Beşe’nin câriye-i memlûkesi olmam ile târîh-i kitâbdan dört sene mukaddem beni tedbîr-i mutlak ile müdebbere etmiş idi. Hâlâ mezbûre Kara Mehmed Beşe vefât edip sülüs malı benim kıymetime kâfi ve vâfî olup ben sâir harâir-i asliyât gibi hürre olmuş iken zevce-i metrûkesi müvekkile-i mezbûre bana zevci mezbûrun terekesinden olup rık olmak üzere nâ-hak vaz‘-ı yed etmişdir. vekîl-i mezbûrdan suâl olunup yedi üzerimden kasr ve sebîlim tahliye olunmak matlûbumdur dedikde gıbbe’s-suâl ve akībe’l-inkâr ve ba‘de-talebi’l-beyyine udûl-ı Müslimînden dergâh-ı âlî yeniçerilerinden Otuzuncu Bölüğe mahsûs oda ahâlîsinden Mehmed Beşe b. Ali ve mahalle-i mezbûre sükkânından Ahmed Ağa b. Zülfikar nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka târîh-i kitâbdan dört sene mukaddem mezbûr Kara Mehmed bizim huzûrumuzda evsâf-ı mezkûre ile mevsûfe olan câriye-i memlûkesi işbu Şahbaz’ı tedbîr-i mutlak ile müdebbere edip ve merkūmenin kıymetine tereke-i müteveffâ-yı mezbûrun sülüsü vâfî ve kâfî olmağla hâlâ mezbûre Şahbaz sâir harâir-i asliyât gibi hürre olmuşdur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde gıbbe ri‘âyetihî şerâiti’l-kabûl şehâdetleri makbûle olmağın mûcebiyle ba‘de’l-hükm mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Recebi’l-mürecceb li-sene ihdâ ve semânîn ve elf. Şuhûdü’l-hâl: Ahmed Ağa b. Zülfikar, Mehmed Beşe b. Ali, Musa Beşe b. İshak, Ahmed Çelebi b. Ali, Mustafa Çelebi b. el-kazzâz.