Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 181 Hüküm no: 168 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe’nin Canbâziye mahallesindeki menzilini Mustafa Beşe’ye satması Dârü’l-hilâfeti’l-aliyye Kostantıniyyetü’l-mahmiye’de merhûm Koca Mustafa Paşa Câmi‘-i şerîfi kurbünde Canbâziye mahallesinde sâkin Ahmed Beşe b. Hasan nâm kimesne meclis-i şer‘-i şerîf-i lâzımü’t-teşrîfde işbu sâhibü’l-kitâb Mustafa Beşe b. Mahmud nâm kimesne mahzarında ikrâr-ı tâm ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Mehmed Çelebi mülkü ve bir tarafdan mahalle-i mezbûrede imâm olanlara meşrûta vakıf menzil ve bir tarafdan Mahmud Ağa mülkü ve bir tarafdan tarîk-i âm ile mahdûd iki bâb tahtânî odalar ve bir kenîf ve havluyu müştemil mülk menzilimi cümle tevâbi‘ ve levâhıkı ve âmme-i hukūk ve merâfıkı ile mezbûr Mustafa Beşe’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile seksen beş kıt‘a esedî guruşa bey‘ ve teslîm, ol dahi vech-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûr seksen beş kıt‘a esedî guruşu merkūm Mustafa Beşe yedinden tamâmen ahz u kabz eyledim, ba‘de’l-yevm menzil-i mahdûd-ı mezbûr merkūm Mustafa Beşe’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’s-sâbi‘ min-Recebi’l-ferd li-sene ihdâ ve semânîn ve elf. Şuhûdü’l-hâl: Ahmed Beşe b. Abdullah, el-Hâc Fettah b. Receb, Mehmed Beşe b. Yusuf, İbrahim Çelebi b. Ahmed, el-Hâc Habib b. Mahmud, Yusuf Bey b. Abdullah.