İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 488 Hüküm no: 745 Orijinal metin no: [94b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâssa kasaplardan Şiro’nun Eflaklı bazı şahıslardaki alacağının tahsil olunması Kıdvetü’l-ümerâ’i’l-milleti’l-Mesîhiyye umdetü küberâ’i’t-tâ’ifeti’l-İseviyye Eflak Voyvodası Aleksandra Voyvoda tevkī‘-i refî‘-i hümâyûn vâsıl olıcak ma‘lûm ola ki, Matbah-ı Âmirem için et veren hâssa kasablardan Şiro nâm kasabın Eflak sâkinlerinden Madoş zimmî ve Koster oğlu Dimo ve İstrelor v. Aleksi nâm zimmîlerde, koyun akçesinden üç yük yetmiş altı bin akçe hakkı olup, bundan akdem hakkı alıverilmek için emr-i hümâyûnumla kapıcılar ta‘yîn olunup, hakkın alıveresiz veyâhud kendileri südde-i sa‘âdetime gönderesiz deyû emirlerde derc olunup, üç dört kıt‘a müekked emirler verilmişken, geri hakkı alıverilmeyip ve hasımları Âsitâne-i sa‘âdetime gönderilmeyip mezbûra gadr u hayf olduğu ecilden, bu def‘a dergâh-ı mu‘allâm çavuşlarından kıdvetü’l-emâsil ve’l-akrân ( ) Çavuş ta‘yîn olunup mezbûr çavuş buyurdum ki, hükm-i şerîfimle dergâh-ı mu‘allâm bevvâblarından fahrü’l-akrân Rıdvan -zîde mecduhû- vardıkda mezbûr zimmînin elinde olan temessükü mûcebince hakk-ı mezbûru hesâb edip, mûmâ-ileyh çavuş mübâşeretiyle alıverip, bir vechile ta‘allül ve bahâne ve inâd ve muhâlefet ettirmeyesiz, vermekde inâd ederler ise mezbûr çavuşa koşup Âsitâne-i sa‘âdetime gönderesiz, emrimin icrâsında ihtimâm üzre olasız, şöyle bilesiz alâmet-i şerîfe i‘timâd kılasız. Tahrîren fî evâsıtı şehri Cemâziyelevvel sene seb‘a ve ışrîn ve elf. Be makām-ı Kostantıniyye.