İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 489 Hüküm no: 746 Orijinal metin no: [95a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hâssa kasaplardan Şiro’nun Eflak bölgesinden koyun satın alacağı Kıdvetü’l-ümerâ’i’l-milleti’l-Mesîhiyye umdetü küberâ’i’t-tâ’ifeti’l-İseviyye Eflak Voyvodası Aleksandra Voyvoda tevkī‘-i refî‘-i hümâyûn vâsıl olıcak ma‘lûm ola ki, matbah-ı âmire ve yeniçeri meydânına ve vüzerâ-yı izâmıma et veren hâssa kasablarından Şiro nâm kasab mukaddemâ Eflak voyvodasına karz verdiği dokuz yüz bin akçe mukābelesinde Aşağıref‘ ve Arıhani? ve Umyaci ve Sakyaki ve Yukarızıh? nâm nâhiyelerden on bin koyun verilmek ta‘ahhüd olunup, hâlâ mezbûr Şiro cem‘ine müteveccih olmağın, zikr olunan koyun cem‘ olunmuş ise dahi cem‘ edenlerden alıverilmek bâbında emr-i şerîfim recâ etmeğin buyurdum ki, hükm-i şerîfimle dergâh-ı mu‘allâm bevvâblarından fahrü’l-akrân Rıdvan -zîde kadruhû- vardıkda zikr olunan on bin koyunu temessükü mûcebince merkūm Şiro’ya cem‘ ve kabz etdirip, bu cânibe gönderesin, eğer zikr olunan on bin koyun senin tarafından âhara dahi cem‘ etdirilmiş ise geri mezbûr Şiro’ya alıverip, emr-i hümâyûnumun icrâsında mücidd-i sâ‘î olasın, şöyle bilesin alâmet-i şerîfe i‘timâd kılasın. Hurrire fî evâsıtı şehri Cemâziyelevvel li sene seb‘a ve ışrîn ve elf. Be makām-ı Kostantıniyye.