İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 490 Hüküm no: 748 Orijinal metin no: [95b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sefer için İstanbul esnâfından mimar ve neccâr akçesinin toplanıp Diyarbakır’a gönderilmesi Akzâ kuzâti’l-Müslimîn evlâ vülâti’l-muvahhidîn madenü’l-fazl ve’l-yakīn vâris-i ulûmü’l-enbiyâ ve’l-mürselîn hüccetü’l-hakkı ale’l-halkı ecma‘în el-muhtas bi mezîdi inâyeti’l-meliki’l-mu‘în mevlânâ İstanbul kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki, iftihârü’l-emâcid ve’l-ekârim bi’l-fi‘il cebecilerim başı olan Mehmed -dâme mecduhû- tezkire gönderip, mahrûse-i İstanbul’dan sefer-i hümâyûnum mühimmâtı için irsâl olunagelen mi‘mâr ve neccâr akçeleri olageldiği üzre İstanbul esnâfından cem‘ u tahsîl olunmak için i‘lâm etmeğin, imdi rûz-ı nevrûzda serdâr-ı âlî-mikdârım Diyarbakır’dan hareket eylemek musammem olmağla, zikr olunan mi‘mâr ve neccâr akçesi olageldiği üzre cem‘ u tahsîl ve serdâr-ı âlî-mikdârımın yanında Cebehâne-i Âmire’mde olan esnâfa tevzî‘ için irsâl eylemen emrim olmuşdur buyurdum ki, vusûl buldukda sâdır olan emrim üzre bu husûsa ihtimâm eyleyip, sinîn-i sâbıkada sefer-i hümâyûnum vâki‘ oldukça bu vechile tahsîl olunagelmiş ise bu def‘a dahi vech-i meşrûh üzre İstanbul esnâfından cem‘ u tahsîl ve mu‘accelen irsâl ve îsâl eyleyesiz. Bu husûs sâire kıyâs olunmaz, elbette meblağ-ı mezbûr nevrûz-ı sultânî’de ulaşmak lâzımdır, bu cânibde zikr olunan esnâf hâzırdır hemen akçelerin ale’t-ta‘cîl gönderip avk u te’hîre rızâ vü cevâz göstermeyesiz, şöyle bilesiz alâmet-i şerîfe i‘timâd kılasız. Tahrîren fî evâili şehri Muharremi’l-harâm sene seb‘a ve ışrîn ve elf. Bi medîne-i Âmed.