İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 490 Hüküm no: 749 Orijinal metin no: [95b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zeynep Hâtun Vakfı Câbisi Mustafa b. Mehmed’in berâtının yenilenmesi Sebeb-i tahrîr-i tevkī‘-i refî‘-i hümâyûnum oldur ki, Cülûs-ı hümâyûnum vâki‘ olmağla umûmen tecdîd-i berât fermân-ı şerîfim olmağın, mahmiye-i İstanbul’da vâki‘ Zeyrek câmi‘inde merhûme Zeynep Hâtun’un vakt-i subhda tilâvet olunan eczâ-i şerîfi evkāfına yevmî bir akçe ile câbî olan işbu dârende-i fermân-ı hümâyûn Mustafa b. Mehmed südde-i sa‘âdetimden tecdîd-i berât recâ eylemeğin, bin yirmi altı Zilka‘desi’nin yirmi üçüncü gününde müceddeden bu berât-ı sa‘âdet-âyâtı verdim ve buyurdum ki, varıp evkāf-ı mezbûrede câbî olup hizmet-i lâzımesin mer‘î ve mü’eddâ kıldıkdan sonra, ta‘yîn olunan yevmî bir akçe vazîfesin evkāf-ı mezbûre mütevellîsinden mâh be mâh alıp mutasarrıf ola, şöyle bileler alâmet-i şerîfe i‘timâd kılalar. Tahrîren fi’l-yevmi’s-sânî aşer mine’l-Muharremi’l-harâm li sene seb‘a ve ışrîn ve elf. Be makām-ı Kostantıniyye el-mahmiyye.