İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 491 Hüküm no: 750 Orijinal metin no: [95b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Piyade Sakalar Kethüdâlığı’na Mehmed b. Ali’nin tayini Piyade sakalar kethüdâsının berâtıdır. Nişân-ı şerîf-i âlîşân İstanbul kadısı olan akzâ kuzâti’l-Müslimîn Mevlânâ Seyyid Mehmed -zîdet fezâ’iluhu- mührüy[le südde-i] sa‘âdetime mektûb gönderip, mahrûse-i İstanbul’da piyâde sakalar kethüdâsı olan Ali oğlu İsa sılasına gitmekle kethüdâlığı mahlûl olmağın, yine tâ’ife-i mezbûreden Ali oğlu dârende-i fermân-ı hümâyûn Mehmed için hizmet-i mezbûre uhdesinden gelmeğe kādirdir deyû kethüdâlığı mezbûra verilmek recâsına arz etmeğin, bu nişân-ı hümâyûn-ı izzet-makrûnu verdim ve buyurdum ki, ba‘de’l-yevm mahrûse-i mezbûrede piyâde sakalar kethüdâsı olup, şol ki vezâyif hidemât-ı piyâde sakalığıdır, kadîmden olageldiği üzre mü’eddâ kıla ve hâne-i avârızdan ise vere, ol bâbda hiç ahad mâni‘ u dâfi‘ olmaya, şöyle bileler alâmet-i şerîfe i‘timâd kılalar. Tahrîren fi’l-yevmi’s-sâmin aşer min [şehri] Cemâziyelâhir sene seb‘a ve ışrîn ve elf. Be makām-ı Kostantıniyye el-mahrûse. Kad vasale fî 23 Cemâziyelâhir li seneti’l-mezbûre.