Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 182 Hüküm no: 169 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Çelebi’nin küçük oğlu Mehmed’in vasisi Ahmed Ağa’nın Fatıma Hatun’a vermiş olduğu borç parayı tahsil etmesi Husûs-ı âti’l-beyânı mahallinde tahrîr için gıbbe’l-iltimâs kıbel-i şer‘-i mutahhardan irsâl olunan Mevlânâ Keşfî Mustafa Efendi mahmiye-i İstanbul’da Mimârsinan mahallesinde fahrü’l-etibbâ Mehmed b. Mustafa’nın menziline varıp zeyl-i vesîkada muharrerü’l-esâmî olan Müslimîn huzûrunda akd-i meclis-i şer‘-i şerîf eyledikde mahmiye-i mezbûre mahallâtından Molla Ahî mahallesinde sâkin iken bundan akdem vefât eden Mehmed Çelebi b. el-Hâc Sinan’ın sagīr oğlu Mehmed’in tesviye-i umûruna kıbel-i şer‘den vasiyy-i mansûbu olan umdetü’l-a‘yân Ahmed Ağa b. Mustafa meclis-i ma‘kūd-ı mezbûrda Acem Mehmed Efendi’nin zevce-i metrûkesi olan işbu bâ‘isü’l-kitâb Fâtıma Hatun bt. Mehmed Efendi mahzarında bi’l-vesâye ikrâr ve takrîr-i kelâm [edip] merkūme Fâtıma Hatun mahalle-i mezbûrede vâki‘ iki tarafdan sadriye kebîre kızı Âişe Hatun mülkü ile ve bir tarafdan tarîk-i âm ile mahdûd fevkānî ve tahtânî büyût-ı müte‘addideyi müştemil mülk menzilini bi-tarîkı’l-isti‘lâl dört yüz yirmi kıt‘a esedî guruşa bana bey‘ ve teslîm, ben dahi mâl-ı sagīr-i mezbûr ile sagīr-i mezbûr için iştirâ ve kabûl ve tesellüm etmiş idim. Hâlâ meblağ-ı mezbûr dört yüz yirmi guruşu merkūme Fâtıma Hatun’dan tamâmen vesâyetim hasebiyle ahz u kabz edip menzil-i mezbûru rehniyetden fek eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Receb Çelebi b. Mehmed ve Mevlüd b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis min-Recebi’l-ferd li-sene ihdâ ve semânîn ve elf. Şuhûdü’l-hâl: Fahrü’l-a‘yân Mustafa Kethüdâ-yı Fâtıma Sultan, Hasan Ağa b. Hüseyin, Sipâhi Mehmed Ağa b. Abdülkerim, Mehmed Ağa b. Hasan, Hasan Ağa b. Abdullah, Mustafa Ağa b. Ali, Mustafa Efendi b. Mehmed, Abdülhaluk Efendi b. Abdurrahman el-imâm, Ömer Çorbacı b. Cafer, Mehmed Çelebi b. Ivaz, Abdurrahman Çelebi b. Mehmed.