Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 183 Hüküm no: 170 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kahire Kadısı Acem Mehmed Efendi’nin varislerine intikal eden menzil hisselerini satmaları Dârü’l-hilâfeti’l-aliyye Kostantıniyyetü’l-mahmiye mahallâtından Mimârsinan mahallesi sükkânından olup Mısr-ı Kāhire kādısı iken bundan akdem vefât eden Acem Mehmed Efendi’nin verâseti zevce-i metrûkesi Fâtıma Hatun bt. Mehmed Efendi’ye ve sulbiye kebîre kızı Âişe Hatun’a ve sulbiye sagīre kızı Meryem’e münhasıra olup kable’l-kısme sagīre-i mezbûre Meryem dahi vefât edip verâseti vâlidesi mezbûre Fâtıma Hatun’a ve li-ebeveyn kız karındaşı mersûm Âişe’ye münhasıra ve bi-tarîkı’l-münâsaha tereke-i müteveffâ-yı evvel seksen sehm i‘tibâr olunup sihâm-ı mezbûreden yirmi dört sehmi mezbûre Fâtıma’ya ve elli altı sehmi mezbûre Âişe’ye isâbet etdiği ve müteveffâ-yı evvel-i mezbûrun terekesinden olup mahalle-i mezbûrede vâki‘ iki tarafdan zikri âtî müşterâ mülkleri ve bir tarafdan ba‘zan Mimâr Sinan Mescid-i şerîfi ve ba‘zan Yavuz Efendi türbesi ve bir tarafdan tarîk-i âm ile mahdûd dâhiliyesi fevkānî üç bâb oda ve iki sofa ve dehliz ve tahta-pûş ve tahtânî üç bâb oda ve bir sofa ve su kuyusunu ve kenîf ve matbah ve hamam ve arsa-i hâliyeyi ve muhavvata-i hâriciyesi fevkānî dört bâb oda ve bir orta sofa ve dehliz ve tatânî bir bâb oda ve bir ahur ve bir matbah ve bir tahtadan masnû‘ oda ve su kuyusu ve kenîf ve bahçe ve havluyu müştemil menzil tafsîl-i meşrûh üzere bi’l-ırsi’ş-şer‘î merkūmetân Fâtıma ve Âişe Hatunlara intikāl eylediği şer‘an mütehakkık oldukdan sonra merkūmetân Fâtıma ve Âişe Hatunlar menzil-i mezbûru kābil-i kısmet olmağla bin yetmiş senesi Şa‘bâni’l-mu‘azzamının yirmici gününde mahmiye-i Kostantıniyyede kādı olan merhûm Ruhullah Efendi b. Mehmed Emin Efendi’ye ba‘de’l-iltimâs merhûm-ı mûmâ-ileyh dahi menzil-i mezbûra gelip akd-i meclis etdikden sonra mimâr-ı sultânî olan el-Hâc Hasan b. Ömer taksîme ba‘de’l-izn mimâr-ı mezbûr dahi ba‘de’l-misâha ve’t-takvîm menzil-i mahdûd-ı mezkûrdan mescid-i mezkûr tarafında vâki‘ ve hâriciyeden müfrez fevkānî iki bâb oda ve orta sofa ve dehliz ve tahtânî bir oda ve bir matbah ve bir tahta oda ve matbah önünde olan su kuyusuyla arsa-i hâliye merkūme [35b] Fâtıma’nın yirmi dört sehm hissesine ta‘yîn ve tahkīk edip ve dâhiliye menzil-i mezbûru müştemilâtı ile ve hâriciyeden dahi ma‘lûmü’l-mikdâr arsa üzerinde vâki‘ iki bâb fevkānî oda ve önünde arsa-i hâliye ve mecmû‘ bahçe ve dâhiliyede fevkānî üç bâb oda ve iki sofa ve tahtânî üç bâb oda ve iki sofa ve tahta-pûş ve kenîf ve matbah ve hamam ve su kuyusu ve arsa-i hâliye mezbûre Âişe Hatun’un elli altı sehm hisse-i meşrûhasına ta‘yîn ve tahkīk etmekle her biri bi’t-terâzi hisse-i meşrûhalarını mutasarrıf olup akd-i âtî sudûruna değni silk-i mülklerinde ve taht-ı yed ve tasarruflarında olup mahalle-i mezbûreden fahrü’l-a‘yân Sipâhi Mehmed Ağa b. Abdülkerim ve mezkûr Tabib Mehmed Efendi’nin ta‘rîfleri ile mu‘arrefe olan merkūmetân Fâtıma ve Âişe hatunlardan her biri zikri âtî mübâya‘ayı mahallinde tahrîr için bi’l-iltimâs taraf-ı şer‘den irsâl olunan Mevlânâ Keşfî Mustafa Efendi mahalle-i mezbûrede vâki‘ umdetü’l-etibbâ Mehmed Efendi b. Mustafa’nın menzilinde zeyl-i vesîkada mastûrü’l-esâmî olan Müslimîn huzûrunda akd eylediği meclis-i şer‘-i hatîrde hâlâ surre emîni olan umdetü’l-emâcid ve’l-ekârim zü’l-kadri’r-refî‘ ve’l-câhü’l-menî‘ sâhibü hâze’l-kitâb Yusuf Efendi b. Hüseyin Efendi’ye merkūm Fâtıma Hatun hisse-i meşrûha-i ma‘lûmesini bi-cümleti’t-tevâbi‘ ve’l-levâhık iki bin on kıt‘a esedî guruşa ve merkūme Âişe Hatun kezâlik hisse-i meşrûha-i ma‘lûmesini bi-cümleti’t-tevâbi‘ ve’l-levâhık dört bin altı yüz doksan kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm, mûmâileylh Yusuf Efendi dahi herbirinin hisse-i meşrûhalarını iştirâ ve kabûl ve tesellüm eyledikden sonra meblis-i mezbûr merkūme Fâtıma’nın yedine semen-i mezbûr iki bin on kıt‘a esedî guruşu ve mezbûre Âişe Hatun yedine semen-i merkūm dört bin altı yüz doksan kıt‘a esedî guruşu tamâmen def‘ ü teslîm ve merkūmetândan herbiri dahi ba‘de’t-tesellüm menzil-i mahdûd-ı mezkûr mûmâ-ileyh Yusuf Efendi’nin mülk-i müşterâsı olduğunu Mevlânâ-yı mezbûr mahallinde tahrîr ba‘dehû ma‘an irsâl olunan Receb Çelebi b. Mehmed ve Mevlüd b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ min-Recebi’l-mürecceb li-sene ihdâ ve semânîn ve elf. Şuhûdü’l-hâl: Umdetü’l-a‘yân Mustafa Ağa b. Abdülmennan, umdetü’l-eşbâh Hasan Ağa b. Hüseyin, fahrü’l-a‘yân Sipâhi Mehmed Ağa b. Abdülkerim, Mehmed Ağa b. Hasan, Hasan Ağa b. Abdullah, Abdurrahman Çelebi b. Mehmed, Çorbacı Mehmed Ağa b. Safer, Mehmed Halîfe b. Ivaz.