Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 184 Hüküm no: 171 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın Rus asıllı kölesi Zülfikâr’ı azat etmesi Mahmiye-i İstanbul’da Mimârsinan mahallesi sükkânından fahrü’l-akrân Ahmed Ağa b. İbrahim tarafından husûs-ı âti’l-beyâna vekîl olduğu Nasuh b. Hasan ve İbrahim Beşe b. Bayram nâm kimesneler şehâdetleri ile şer‘an sâbite olan Halil Beşe b. İbrahim nâm kimesne meclis-i şer‘-i şerîfde bi’l-vekâle ikrâr ve takrîr-i kelâm edip müvekkil-i mezbûr Ahmed Ağa kendüye rıkkını mu‘terife olan işbu uzun boylu, açık kaşlı, elâ gözlü Moskoviyyü’l-asl Zülfikar b. Abdullah nâm abd-ı memlûkünü hasbeten lillâhi’l-aliyyi’l-a‘lâ ve taleben li-merzâti Rabbi’r-rahîm malından tahrîr ve i‘tâk ve zümre-i harâir-i asliyyîne idrâc ve ilhâk eyledi. Min-ba‘d mevsûf-ı mezbûr sâir ahrâr-ı asliyyîn gibi hür olup üzerinde velâ-yı şer‘îden gayrı hakkı kalmadı dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’s-sânî min-şehri Recebi’l-ferd li-sene ihdâ ve semânîn ve elf. Şuhûdü’l-hâl: İbrahim Çelebi b. Ahmed, Şükrullah Bey b. Mustafa, Abdi Çelebi b. Hüseyin, Veli b. Mahmud.