Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 185 Hüküm no: 172 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime Hatun’un cariye davasında anlaşma sağlanması Mahmiye-i İstanbul’da Eski İmâret mahallesi sâkinelerinden Rahime bt. Yahya nâm hatun meclis-i şer‘-i şerîfde Emine bt. Ferhad nâm hatun mahzarında ikrâr ve takrîr-i kelâm edip mezbûre Emine orta boylu, açık kaşlı, elâ gözlü Rusiyyetü’l-asl Dilaver bt. Abdullah nâm câriyeyi târîh-i kitâbdan altı ay mukaddem yedinde mülkü ve hakkı olduğu hâlde uyûbdan sâlime olmak üzere altmış beş esedî guruşa bana bey‘ ve teslîm, ben dahi iştirâ ve def‘-i semen edip mezbûre Emine dahi kabz-ı semen etmiş idi. Lâkin mevsûfe-i mezbûre istisgā marazına mübtelât ve mu‘ayyebe olup ayb-ı mezbûrun ibtidâsı sene ve hudûsü dokuz aydan mukaddem bâyi‘-i mezbûr yanında mevcûd ve kadîm iştidâdı ile istiskā olduğu etibbâdan Mehmed Efendi b. Mustafa ve Yusuf b. Abdullah’ın ihbâr ve şehâdetleri ile mütehakkık olup iştidâdı şer‘an ayb-ı âhar olmağla mâni‘-i red ve mezbûre Emine dahi kabûl etmeyip ehl-i hibre takvîmleri ile noksân-ı ayb otuz guruş olmağla mezbûre Emine otuz beş esedî guruşu bana def‘ ü teslîm, ben dahi yedinden ahz u kabz etdiğimden sonra câriye-i mezbûreye müte‘allıka âmme-i da‘vâdan mezbûre Emine’nin zimmetini ve mezbûre Emine dahi noksân-ı ayb olmak üzere bana teslîm etdiği otuz beş esedî guruşa müte‘allıka âmme-i da‘vâdan benim zimmetimi ibrâ-i âmm-ı kâtı‘u’n-nizâ‘ ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-sâbi‘ min-Recebi’l-mürecceb li-sene ihdâ ve semânîn ve elf. Şuhûdü’l-hâl: Hacı Mehmed b. Ahmed, Hüseyin Beşe b. Muharrem, Şükrullah Bey b. Mustafa, İbrahim Çelebi b. Mehmed, Veli Bey b. Mahmud, Şa‘bân Bey b. Hüseyin, Mustafa Çelebi b. el-Hâc Ahmed, Ramazan b. Mehmed.