İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 104 Hüküm no: 10 Orijinal metin no: [1a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Davud’un evini satması için Çiçekçizâde Ahmed Çelebi b. Receb’i vekil ettiği Mahmiye-i İstanbul’da Cafer Ağa mahallesinde sâkin iken bundan akdem fevt olan Çiçekçizâde Ahmed Çelebi b. Receb’in verâseti zevce-i metrûkesi Hadîce bt. Ali’ye ve vâlidesi Hadîce bt. Davud’a ve sulbî oğlu Mustafa nâm sagīre münhasıra olduğu şer‘an zâhir ve müte‘ayyin oldukdan sonra mezbûre Hadîce bt. Davud mahfil-i kazâda müteveffâ-yı mezbûrun terekesine vâzı‘u’l-yed olan sagīr [oğlu Mustafa’nın] kıbel-i şer‘den mansûb vasî Veli Beşe b. Hasan ile zevce-i mezbûre Hadîce mahzarında üzerlerine takrîr-i da‘vâ edip müteveffâ-yı mezbûr Ahmed Çelebi’yi hayatında mahalle-i mezbûrede vâki‘ ma‘lûmü’l-hudûd mülk menzilimi bey‘ ve semenini kabz ve bana îsâle tarafımdan vekîl nasb ve tay‘în edip ol dahi ba‘de kabûlü’l-vekâle menzil-i mezbûru yedi bin akçeye vekâleten bey‘ ve semenini kabz ve kendi mesârifine sarf ile istihlâk edip bana teslîm etmemekle zimmetinde kalmışdır. Hâlâ taleb ederim mezbûrdan suâl olunsun dedikde gıbbe’s-suâl mezbûrân husûs-ı mezbûru bi’l-külliye inkâr edicek müdde‘îye-i mezbûreden müdde‘âsını mübeyyin beyyine taleb olundukda mahalle-i mezbûre sükkânından Ahmed Beşe b. Hasan ve Ahmed Çelebi b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûre Âişe bt. Davud müteveffâ-yı mezbûr Ahmed Çelebi’ye hayatında mahalle-i mezbûrede vâki‘ ma‘lûmü’l-hudûd mülk menzilini bey‘ ve semenini kabz ve kendiye îsâle tarafından vekîl nasb ve ta‘yîn eyledikde ol dahi ba‘de kabûlü’l-vekâle menzil-i mezbûru yedi bin akçeye bizim huzûrumuzda bey‘ ve semenini kabz ve kendi mesârifine sarf eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra meblağ-ı mezbûr yedi bin akçeyi mezbûr Ahmed Çelebi’den hayatında küllen veyâ ba‘zan ahz u kabz veyâ hîbe veyâ âhara havâle etmeyip vücûb-ı şer‘iyeden bir vechile zimmetini ibrâ ve ıskāt etmediğine mezbûre Âişe bt. Davud’a yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebince ba‘de’l-hükm mâ-vaka‘a bi’t-taleb ketb olundu. Fi’l-hâmis aşer min-Recebi’l-ferd li-sene isneyn ve seb‘în ve elf. Şuhûdü’l-hâl: Hüseyin Efendi el-Burûsî, Rasûl b. Rıdvan, Şükrullah b. Mustafa. Mehmed b. Ramazan, Abdi Beşe b. Hüseyin.