İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 105 Hüküm no: 11 Orijinal metin no: [1a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çiçekçizâde Ahmed Çelebi b. Receb’in karısının terekesinden mehrini ve alacağını taleb ettiği İşbu râfi‘atü’r-rakīm Hadîce bt. Ali mahfil-i kazâda mahmiye-i İstanbul’da Cafer Ağa mahallesinde sâkin iken bundan akdem fevt olan Çiçekçizâde Ahmed Çelebi b. Receb’in terekesine vâzı‘u’l-yed olan sagīr oğlu Mustafa’nın kıbel-i şer‘den mansûb vasîsi Veli Beşe b. Hasan ile vâlidesi Hadîce bt. Davud mahzarlarında üzerlerine da‘vâ ve takrîr-i kelâm edip müteveffâ-yı mezbûr Ahmed Çelebi’ye târih-i kitâbdan sekiz sene mukaddem on dört bin akçe mehr-i mü’eccel üzerine nefsimi tezvîc ol dahi tezevvüc ve kabûl etmekle zimmetinde mütekarrir olan on dört bin akçe mehr-i mü’eccelim ile hayatında ikrâz ve teslîm eylediğim kırk guruşu kable’l-ahz fevt olmağın zimmetinde kalmağla hâlâ meblağayn-i mezbûreyni tereke-i müteveffâ-yı mezbûrdan taleb ederim, mezbûrândan suâl olunsun dedikde gıbbe’s-suâl ve akībe’l-inkâr müdde‘îye-i mezbûreden müdde‘âsını mübeyyin beyyine taleb olundukda mahalle-i mezbûre sükkânından Ahmed Çelebi b. Mehmed ve Sunullah b. Hasan ve Timurtaş mahallesinden Ahmed Beşe b. Hasan nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ mezbûre Hadîce bt. Ali târih-i kitâbdan sekiz sene mukaddem mezbûr Ahmed Çelebi’ye on dört bin akçe mehr-i mü’eccel üzerine nefsini bizim huzûrumuzda tezvîc edip ol dahi tezevvüc ve kabûl eylediğinden mâ‘adâ mezbûr Ahmed Çelebi’ye hayatında bizim huzûrumuzda mezbûre Hadîce kırk guruş ikrâz ve teslîm ol dahi iktirâz ve tesellüm ve kabz eyledi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra müteveffâ-yı mezbûrdan meblağayn-i mezbûreynden hayatında küllen veyâ ba‘zan ahz u kabz veyâ hîbe ve âhara havâle etmeyip ve vücûb-ı şer‘iyeden bir vechile zimmetini ibrâ ve ıskāt etmediğine mezbûre Hadîce bt. Ali’ye yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebince ba‘de’l-hükm mâ-vaka‘a bi’t-taleb ketb olundu. Fi’l-hâmis aşer min-şehri Recebi’l-mürecceb li-sene isneyn ve seb‘în ve elf. Şuhûdü’l-hâl: es-Sâbıkūn